İzmir'den maʿzûl ve ser-âmed-i ʿulemây-ı fuhûl olan es-Seyyid Mehmed Münîb Efendi, [Ü4 206b] Şeyhülislâm-ı sâbık tarafından sinân-ı lisân ile zahm-dâr ve bu eziyyet-i cân-hırâşın hüsn-i mükâfâtı zımnında dest-i berdâşte-i dergâh-ı Perverdigâr olmuşidi. Müfti'l-vakt sânehullâhu ʿani'l-makt cenâbları mûmâ ileyhin derece-i ʿilm ü kemâline kesb-i yakîn ve bu tarîk-ı feyz-refîkde bir nevʿ ikrâm ile mültefet olması esbâbına rasad-bîn olup, Efendi-yi mûmâ ileyh bundan akdem tercemesine muvaffak olduğu Siyer-i Kebîr'e gāyet-i tedkīk ve nihâyet-i tahkīk ile bir Hâşiye taʿlîk edüp, Südde-i saʿâdet'e ʿarz u takdîmini cenâb-ı Fetvâ-penâhî'den istidʿâ ve müşârun ileyh dahi mahsûs bir kıtʿa ʿarîza ile mâhiyyet ü haysiyyetini ve bâ-husûs bu defʿa takdîm eylediği Hâşiye'nin fevâyid-i tahkīkātını beyân ederek, Mekke Pâyesi'yle kayırılmasını recâ edüp, telhîsi terbiye-i hazret-i [V 78a] Sadâret-penâhî ile maʿrûz-ı dergâh-ı Tâc-dârî kılınup, recâsına müsâʿade ve şehr-i Rebîʿulevvel evâyilinde Mekke-i mükerreme Pâyesi'yle kadr ü iʿtibârı ziyâde kılındı.