Anadolu Vâlîsi Gürcü ʿOsmân Paşa'nın defʿ-i vücûd-ı levs-âlûduna mukaddime olmak üzere Anadolu Eyâleti'nden tecnîbi ve bir mahall-i bâʿîde tesrîbi hâtır-güzâr-ı Şehriyârî olup, Çıldır etrafında tevellüd eden ihtilâlin indifâʿına kaviyyü'l-iktidâr bir Vezîr'in Erzurum'a taʿyînini gûyâ zarûriyyât-ı vakt îcâb eyledi, zemîninde müşârun ileyhe Erzurum Eyâleti ve selefi Vezîr ʿAlâʾeddîn Paşa'ya Anadolu Eyâleti tevcîh olunup, müşârun ileyhin bakıyye-i ahvâli [Ü4 207a] bundan sonra neye müncerr olacak ise, inşâʾallah ber-vech-i etemm çekîde-i kalem-i nâdire-rakam kılınur. Bir müddetden berü ber-vech-i arpalık Köstendil Sancağı'na mutasarrıf olan Pilaslı Mehmed Paşa, şâyibe-i sadâkatden hâlî olmayup, üzerinde olan sancak ile idâre-i umûr edemeyeceği maʿlûm-i cenâb-ı Sadr-ı ʿâlî olup, işbu Rebîʿulevvel'in üçüncü günü Tırhala Sancağı, Tebedelenli-zâde ʿuhdesinden tahlîs ve müşârun ileyhe ber-vech-i ilhâk tevcîh ü tahsîs olundu.