ʿÂlem, fesâda mâyil ve dost ile düşmen miyânını tefrîk müşkil olup, sadîk ʿadd etdiğin şahısdan ʿadüvvden ziyâde hazer ü ictinâb lâzım olduğunu, [V 71a] kudemây-ı hükemâ kitâblarında tahrîr etmişlerdir. [Ü4 199b] Nazm: A'da 'adüvvike ednâ men vesikte bihî Ve hâziri'n-nâse v'ahsebhüm ʿalâ dahal Çok kerre muhibb ʿadd etdiğin kimseden, ziyân ve ʿadüvv ittihâz eylediğinden, nefʿ-i firâvân nümâyân olmuşdur. Nazm: Kem kātıʿin li'l-vasli yüʾmenü vüddühû Ve muvâsılin bi-vidâdihî yürtâbü Nevʿ-i beşer ʿalâ-ihtilâfi tabakātihim mülk ü devlet ve câh u rifʿat sebebleriyle birbirine muhâsede ve benî nevʿinin nâyil olduğu niʿamın intizâʿı içün ʿale'd-devâm mugālebe vü mücâdele kasdında olmak emr-i cibillî olup, bu sûretde her şahs-ı mütebassır hazm ü ihtiyâtı terk etmemek ve zevâl ü intikās-ı niʿmetine rasad-bîn olanlardan ittikā eylemek, hasmını itâb ve tecâvüzden ictinâbına tahsîl-i esbâb etmiş olur. “Düzd-i şebrev ü çâlâ ki, âgâhî-yi sâhib-i hâne sedd-i sedîd” ve mâlının ʿadem-i telef ü ziyâʿına bir hısn-ı müşeyyed olacağı zâhir ü bedîddir. Nazm: Lâ tetruki'l-hazme fî-şey'in tuhâziruhû, Fe-in selimte fe-mâ fi'l-hazmi min-be's. el-ʿAczü züllün ve-mâ bi'l-hazmi min-zararin, V'ahzemü'l-hazme sû'ü'z-zanni bi'n-nâs. Sâlifü'z-zikr mektûbun istihsâli zımnında İngiliz Elçisi'nin su'âli tekerrür eylediğine binâ'en, emniyyetlerini îcâb edecek sûretde taraf-ı hazret-i Sadâret-penâhî'den bir kıtʿa mektûb tahrîr ü imlâ ve elçi-yi mesfûr tarafına iʿtâ olundu.