Müşârun ileyh Filibe Aʿyânı olup, Rumeli memleketinin müteneffis ü müteşahhıslarından ve kesret-i haşem ü hadem ile zî-kudretlerinden olup, câ-be-câ hidemât-ı Devlet-i ʿaliyye'de istihdâm olunarak, Dergâh-ı ʿâlî Kapucu-başılığı ile bekâm ve Edirne'de Vezîr Hakkı Paşa'ya Kethudây-ı benâm olmuşidi. Müşârun ileyhin inhitâtına vâkıf ve letâyifü'l-hiyel ile Âsitâne'ye munsarıf olup, Rumeli ınzımâmıyla Rütbe-i vâlâ-yı Vezâret'e nâyil ve dağlı eşkıyâsı maslahatıyla Edirne'ye vâsıl oldukda, irâde-i devlete muvâfık hidmete muvaffak olamadığından ʿazl ve Anadolu Eyâleti'ne nakl olunmuşidi. Kütahya'ya vusûlünde halkı ihâfe vü tehdîd kasdıyla o beldenin hânedânı olan Germiyân-zâde'nin kârını tetmîm ve zî-mâl olanları birer behâne ile muʾâhaze vü tecrîm edüp, giderek zulm ü teʿaddîsi ʿalem-gîr ve fukarâ vü zuʿafâ dest-i savletinde esîr olup, bu keyfiyyet karʿ-ı semʿ-i devlet eyledikde, rahmen li'l-ʿibâd Hanya mansıbı ile tard u ibʿâd olunmuşidi. İzmir'e vusûlünde defter-i vüzerâdan ismi ilgā ve baʿde'l-müsâdere İzmir'de ikāme vü îvâ kılındı. [V 68b]