Anadolu Vâlîsi Vezîr ʿOsmân Paşa'nın Deli-başı'sı olup, cemîʿ umûrunda müsteşârı ve darrâʿ ü serrâda kuvvetü'z-zahr ve kafâdârı olan ʿÖmer Ağa, Rumeli'nde bir takrîb ihtilâs-ı Rütbe-i Mîr-i mîrânî ve ol dahi hılâf-ı rızâ hareketde mahdûmuna sânî olup, dâ'ire-i müşârun ileyhden tefrîkı mûcibât-ı mesâlih-i mülkiyyeden olduğuna binâ'en, Anadolu'da bir sancak tevcîhiyle o taraflardan [Ü4 196a] tecnîb ve Anadolu'ya geçüp, yemîn ü yesârında vâkiʿ kurâyı tahrîb ve ehâlîsini garâmet-i mâliyye ile taʿzîb eylediği hasebiyle, fukarâ dest-i tesallutundan pür-havf u bîm ve kangı sancak tarafına tevcîh olunduysa, muhâfaza-i nefs ü mâl kasdıyla ehâlîsi müdâfaʿa sûretini tasmîm ederler idi. Mûmâ ileyhin hatîât-ı sâbıka vü lâhıkasına nazaran istîsâli derece-i vücûba resîde olduğundan, Çapâr-zâde ile nihânî bu keyfiyyet muhâbere olunup, kesret-i haşerât sebebi ile sühûletle itmâm maslahatı mümkin olmayup, Kayseriyye tevcîh olunduğu hâlde, bir takrîb kaydı görüleceği haberini irsâl ve fi'l-hâl Kayseriyye Sancağı, Paşa-yı mûmâ ileyhe tevcîh ve igfâl olunmuşidi. Kayseriyye'ye iki sâʿat mesâfe olan bir karyede askerini bırakup, birkaç âdem ile Kayseriyye'ye duhûl ve Mütesellimlik hânesine nüzûl eyledikde, Çapâr-zâde'nin âdemleri fursat-yâb ve Paşa-yı mûmâ ileyhi küşte-i şemşîr-i âteş-tâb eylediler. Kayseriyye tevcîhinden sonra Anadolu Vâlîsi'nin Çapâr-zâde'ye hâlik-i mezbûrun tavsiyesini şâmil gāyet mü'ekked bir kıtʿa mektûbu vürûd eylediğinden, maʿrifetiyle istîsâl olunduğu mestûr olarak, Âsitâne-i saʿâdet'den Hasekî [V 68a] maʿrifetiyle i'dâm olunduğu işâʿasını recâ ve merkūm ʿan-asl nehhâb ü vehhâb olduğundan, ism-i mâl ıtlâk olunur üç-beş bârgîr ve ceyb ü hemyânında şâyeste-i tahrîr olmayacak nakdi çıkdığını îmâ eylemiş. Merkūmun sühûletle inʿidâmı tasavvur-ı nâsdan bîrûn ve fazl-ı Hâlık-ı bî-çûn olduğu vâreste-i şükûk u zunûn olduğundan başka, hevâdârı olan [Ü4 196b] şahs-ı maʿlûmun cenâh-ı sevreti münkesir ve zevâline mukaddime olduğu zâhirdir.