Bir seneye karîb müddetden berü Sadrıaʿzam Kethudâsı olan Ahmed ʿAtıf Efendi, vüsʿ ü tâkati yetişdiği kadar umûr-ı me'mûresinde kıyâm ve işbu Saferü'l-hayrın sekizinci Bâzâr günü o makām-ı refîʿden ʿazl ve sâhil-hânesinde ârâm ile eyyâmını vakf-ı duʿây-ı bekāy-ı Şehriyâr-ı enâm eyledi. Nazm: Yekî kem-şûd dîger âyed be-cây [V 67a] Zemâne ne-mânend bî-ked-i hudây Sâbıkā Sadrıaʿzam Kethudâsı İbrâhîm Nesîm Efendi, ʿunfuvân-ı eyyâm-ı civânî ve rey'ân-ı hengâm-ı zindegânîden berü hıdemât-ı Devlet-i ʿaliyye'de izhâr etdiği kemâl-i sadâkatin semeresi olarak, evvelen bi'l-asâle ve sâniyen bi'l-vekâle Kethudâlık câh-ı refîʿini ihrâz ve mütehattim-i zimmet-i himmeti olan celb-i ahâyir-i zehâyir ve taʿdîl-i kıyem ü esʿâr husûslarında kesb-i rüchâniyyet ü imtiyâz ve bu vesîle ile zîr-i destân u fukarâdan Şehriyâr-ı sütûde [Ü4 195b] -âsâra isticlâb-ı daʿavât-ı mütekâsire eylediğinden başka, zâtında pîr-i ʿakl ve civân-ı reviyyet ve vâkıf-ı serâyir-i umûr-ı mülk ü millet, sâhib-i karîha ve dîndâr ve gayret-keş-i Devlet-i ebed-karâr olup, dâmen-i ʿismeti levs-i erbâb-ı töhmetden berî ve icrây-ı siyâset-i mülkiyyede levme-i lâ'imden bî-bâk u cerî, sıfat-ı cûd-ı memdûh ile fezâyil-i insâniyyeyi müktesib ve buhl ü imsâk-i müfritdan bi'l-külliyye dâmen-keş ü müctenib olup, yâverî-yi tevfîk ile her ʿukde-i müşkil ve emr-i ʿamîk, hall-kerde-i benân-ı tedkîkı ve teshîlât-ı hutûb-ı nâs, mevkūf-ı yek-lahza-i tahkīkı olduğuna binâ'en, emsâline tefevvuk ve iʿtilâsı maʿlûm-i bâdî vü hâzır ve hıdmet-i mezkûreye istihkākı “Ke'ş-şemsi fi'l-hevâcir” zâhir olup, binâ-berîn yevm-i mezkûrda Bâb-ı ʿâlî'ye daʿvet ve huzûr-ı Sadru's-sudûr'da Kethudâlık hilʿat-i pür-behcetiyle dest-nevâzende-i iʿtibâr u rağbet kılındı. Müşârun ileyhin mahlaslarını iltizâm ve mükerreren Kethudâlık câhını ihrâz etdiklerini îhâm kasdıyla bi'l-bedâhe ser-i kalemden çekîde olan târîh-i garrâ tebrîken bu mahalle kayd u imlâ olundu. [Mısra]: Gülşen-i devlete esdi yine gül-bûy-i Nesîm (گلشن دولته اسدی ینه کلبوی نسیم)