Dağlu eşkıyâsının iskânları evvel-behâra taʿlîk olunup, hulûl-i behâra dek Rumeli Vâlîsi Vezîr ʿAli Paşa'nın Filibe taraflarında ikāmeti fukarâya küllî hasâret îrâs eder mülâhazalarıyla, mansıbına rucûʿu, tarafına tenmîk olunmuşidi. Eyyâm-ı rebîʿ hulûl edüp, müşârun ileyhin bi'n-nefs gelüp, emr-i iskâna şurûʿu fukarânın bir kat dahi mütezarrır [Ü4 191a] olmalarını îcâb etmek, zevâhir-i hâlden olduğuna binâ'en, Çavuş-başı Ağa bâlâda mezkûr sûret ile taʿyîn olunmuşidi. Ağa-yı mûmâ ileyh İskeçe'ye varup, Rumeli hânedânını cemʿ ve ʿAli Monla ve Kara Feyzî'nin iskânları husûsunu müzâkere eylediklerinde, ʿAli Monla'nın Fere'de temkînini Tokadçıklı menʿ ve serd olunan kelâm-ı maʿkūlü müskit ve gayr-i müskit cevâblar ile defʿ kaydında olup, Rumeli Vâlîsi'nin istînâf-ı meʾmûriyyeti ile tekrîr-i rucûʿu nizâʿ-ı küllî zuhûruna ve zuʿafây-ı memleketin hasâret-i ʿazîmeye giriftâr olmasına sebeb-i ʿâdî olduğundan gayri, Rumeli agavâtı müşârun ileyhden bi'l-külliyye müteneffir ve Filibe'de Arnabudlar ile vâkiʿ olan muhârebe müşârun ileyhi ahz-ı intikām gāyilesine mecbûr edeceği vârid-i hâtır olup, eyâlet-i mezkûre munsif [V 64b] ü muʿtedil bir Vezîr'e tevcîh olunduğu hâlde, taʿyîn edeceği Başbûğ ile ittihâd ve o makūle ehl-i fesâdı memleket-i Pâdişâhî'den tasfiyeye bezl-i miknet edeceklerini sûret-i teʿahhüdde îrâd ve bu mazmûnda mahzar irsâl ve âhar sûretle husûl-i mâdde mümkin olmadığından, Çavuş-başı Ağa, Âsitâne-i saʿâdet'e ʿavdet ile sûret-i meʾmûriyyetini tafsîl ü icmâl etmişidi. Bu mülâbese ile müşârun ileyh ʿazl ve Eyâlet-i Rumeli, Selânik Mutasarrıfı Vezîr Vânî Mehmed Paşa'ya tevcîh olunup, tarafına gönderilan taʿlîm-nâme mûcebince hareket eylemesi tenbîh ve münhall olan Selânik Sancağı, Mısr-ı Kāhire'den munsarıf olan Vezîr Husrev Paşa'ya tevcîh olundu. Gürûh-ı eşkıyâdan Kara Feyzî ve ʿAli Monla'nın tedmîr [Ü4 191b] ü istîsâlleri zımnında müteʿahhid bulunan aʿyân-ı memlekete eşedd-i tenbîh ile teʾkîd olunduğuna binâʿen, ʿavn-i Hakk ile her tarafdan turuk u meʿâbirleri mesdûd ve rişte-i cemʿiyyetleri perâkende vü nâ-bûd olacağı her ne kadar muntazır-ı erbâb-ı yakīn ü şühûd ise dahi, eşkıyây-ı mezkûre tahsîl-i semt-i necât ü selâmet ve ızrâr-ı fukarây-ı raʿiyyet kasd-ı fâsidi ile Tekfûrdağı ve o havâlîye müsâmit olan mahallere intişâr edecekleri vârid-i ezhân-ı uli'l-ebsâr olup, li-ecli'l-ihtiyât bir mikdâr güzîde asker ile bir Vezîr'in o etrâfa karîb mahalde istikrârı münâsib görülüp, muʿallem askerden yedi-sekiz bin kadar süvârî ve piyâde tertîb ve Çorlu'da ikāmet ve eşkıyâ verâdan tazyîk olunarak, nâ-çâr berü câniblere [V 65a] güzâr eyledikleri takdîrde ifnâ vü iʿdâmlarına ikdâm u gayret tenbîhâtı ile kasaba-i mezkûreye sevk u irsâl ve İznikmid Mutasarrıfı Vezîr ʿOsmân Paşa bu cemʿiyyete Başbûğ nasb olunup, Çorlu'ya ʿazîmeti husûsu istiʿcâl olunduğundan fazla, Çapâr-zâde ve Kara ʿOsmân-zâde'ye hükm-i Cihân-mutâʿ-ı Sultânî şeref-sudûr ve her biri vâfir asker ile hâzır olup, cemʿiyyet-i mezkûreye iltihâkları müstasveb-i cenâb-ı Sadru's-sudûr oldu.