Müşârun ileyhâ hazretleri bin yüz yetmiş dört senesi Ramazân'ının on beşinci İsneyn gicesi meşîme-çâk-ı şühûd, gehvâre-zîb-i vücûd olup, vâsıl-ı hadd-i temyîz olmadan, Sadr-ı vakt Mustafa Paşa'ya ve andan sonra Serdâr-ı ekrem [Ü4 181a] bulunan Mehmed Emîn Paşa'ya tezvîc ve bâzâr-ı iʿtibâr u menziletleri tervîc olunmuşiken, fevâsıl-ı karîbe ile ikisi dahi maʿdûm-ı dâ'ire-i hayât ve masrûʿ-ı ser-pençe-i memât olup, Sultân ʿAbdülhamîd Hân merhûm hazretlerinin evâyil-i saltanatlarında Vezîr Mustafa Paşa, müşârun ileyhâ hazretlerinin şeref-i izdivâcıyla kesb-i ibtihâc ve mânend-i şîr ü şekker ihtilât u imtizâc etmişiken, tâyir-ı rûhu tayy-i ʿakabât-ı mecâz eyleyerek, sûy-i hakīkīye pervâz eyledi. Müşârun ileyhâ hazretleri Belkīs-sîret, Zehrâ-ʿismet, mestûre-i [V 55a] serâ-perde-i hilm ü hayâ, hacle-nişîn-i kasr-ı menîʿ-i temekkün ü inzivâ, ʿâbide-i sâff-iʿtikād ve zâhide-i pâk-nihâd, dâd-hâhlara muʿîn ü dest-gîr ve zill-i vârif-i merhameti müstevʿib-i mefârık-ı bây ü fakīr olup, der-i mekremet-eseri mecmaʿ-ı vüfûd-i nefʿ ü sûd ve bu bâbda ahkâm-ı Sultâniyye'si her cânibe müteʿâkıbü'l-vürûd olmağla, ekser nâs inkızây-ı metâlibi ile kâm-rân ve duʿây-ı devletiyle ratbü'l-lisân olduklarından, vefâtı cümleye bâʿis-i endûh u ahzân olup, her biri sîne-kûp-i tehassür ü efgān ve mahall-be-mahall eşk-rîz-i mâtem ü eşcân oldular. Civâr-ı feyz-âsâr-ı hazret-i Hâlid'de binâ etdikleri türbe ve sebîl ve mekteb, âsâr-ı cemîlelerindendir, rahmetullâhi ʿaleyhâ.