Diyârbekir Eyâleti tevcîh olunan Vezîr Köse Mustafa Paşa, bundan akdem hulûl-i ecel-i mevʿûduyla vefât ve terk-i meşgale-i kâyinât edüp, tûğ u sancağı maʿa'l-Vezâre mahdûmu Veliyyüddîn Bey'e ʿinâyet olunduğu hâlde, bedel-i muhallefât ve câyize-i Vezâret ve sâyir ʿavâyidât olarak beş yüz kîse kadar cânib-i mîrîye hıdmet eyleyeceğini Trabzon [Ü4 181b] Vâlîsi ve Canik Muhassılı Vezîr Tayyâr Paşa bi'l-istidʿâ tahrîr ü inhâ etmişidi. Mütevaffây-ı müşârun ileyhin derece-i servet ü sâmânına Sadrıaʿzam ve bedr-i efham hazretleri muttaliʿ olup, Darb-hâne ve mîrî taraflarına dahi deyn-i küllîsi olduğunu bu defʿa tahkīk ve o mikdâr şey'-i hasîs ile Vezâret'i husûsuna müsâʿade câyiz olmadığını cezm ü ictihâd ile bu bâbda iʿmâl-i fikr ü dakīk buyurup, zâhir ü bâtında mütevârî olan emvâl ü eşyâ ve zimem ve sâyir tarîf ü telîdi ihfâ olunmayarak hârice ihrâc olunup, keyfiyyet ʿalâ-vechi's-sıhha tahrîr [V 55b] olunmak bâbında muvakkaten Baş-bâkī Kulluğu tevcîh olunan Kapucu- başı Mehmed Ağa, mü'ekked ü müşedded evâmir-i ʿaliyye ile o tarafa tesyîr olunmuşidi. Mübâşir-i mûmâ ileyh o tarafa vusûl buldukda, muktezây-ı me'mûriyyeti üzere tahkīk-ı mâddeye ifrâğ-ı cehd ü tâkat ve birkaç defʿa mükâtebe vü mücâvebe ile mâddenin imkân-ı ʿâdîsini tahrîr ü işâret ve bilâhare deyn-i mîrî ve bedel-i muhallefât ve câyize-i Vezâret ve sâyir cemʿan iki bin dört yüz kırk beş kîse akçaya nizâm verilüp, bu cümlenin altı yüz kîsesi müjde-i Vezâret vürûdunda Mübâşir-i mûmâ ileyhe teslîm ve üç yüz kırk beş kîsesi mansıbına duhûlünün altmış birinci günü edâ olunup, bâkī bin beş yüz kîsesi iki yüz on sekiz senesinden iʿtibâr ile senevî beşer yüz kîse iʿtâsıyla üç senede tetmîm olunmak şurûtu tanzîm olunup, evâsıt-ı Zilhicce'de mîr-i mûmâ ileyhe Sivas Eyâleti inzımâmıyla ʿavâtıf-ı ʿaliyye-i hazret-i Tâc-dârî'den vâlâ-yı câh-ı [Ü4 182a] Vezâret ihsân ve şeb-i deycûr-ı emeli tâb-ı âfitâb-ı Şâhâne ile dirahşân kılındı. Tevcîh-i Eyâlet-i Sivas takrîbi ile tevcîhât-ı cüz'iyye vukūʿ bulmağla, binâberîn sâbıkā Sivas Vâlîsi Vezîr ʿAbdurrahmân Paşa'ya Karaman Eyâleti ve selefi Vezîr ʿOsmân Paşa'ya Kandiye Eyâleti ve selefi Vezîr Dervîş ʿAbdullah Paşa'ya Resmo ve Hanya sancağları ʿinâyet ve cümlesi dil-sîr-i niʿmet-i Şehriyâr-ı gerdûn-bestat kılındı.