Hüdâvendigâr-ı esbak mağfûr ve merhûm Sultân Mustafa Hân hazretlerinin ekber-i benât-ı ʿaliyyetü's-sıfatları olan Şâh Sultân hazretleri, vücûd-ı insâna târî olan aʿrâz-ı emrâz sebebi ile bir müddet pehlû-zede-i pister-i eskām ve vefâtından kırk elli gün mukaddem dâr-ı âhirete ʿazm ü hırâm eylediği şâyiʿası, renciş-resân-ı havâtır-ı enâm olup, hattâ muʿtâd üzere Sultân Ahmed Câmiʿi'nde [V 54b] salâ verilerek, müezzinler icrây-ı ʿâdet ve kâffe-i nâs bükâ vü ʿavîl ile izhâr-ı te'essür ü rikkat etmişiken, haber-i mezkûr erâcîf makūlesinden olduğu tashîh olunup, imtidâd-ı zemân-ı hayâtı aʿlâ vü ednâyı tefrîh etmişidi. Müşârun ileyhânın peymâne-i ʿömrü mâl-â-mâl ve dünyây-ı fânîde kâyin rızk-ı maksûmu vâsıl-ı derece-i kemâl olup, huzzâk-ı etıbbâ derdine devâ bulmakda ʿacz-âver-i hayret ve ʿâkıbetü'l-emr işbu Zilkaʿde'nin on yedinci Cumʿa günü o Râbiʿa-ʿismet terk-i cihân-ı pür-mihnet ve ʿazm-ı dâr-ı âhiret eyledi. Erkân-ı Devlet-i ebed-ittisâl, naʿş-ı mağfiret-nakşını zîb-i ʿâtık-ı taʿzîm ü ibcâl edüp, Lâleli Câmiʿi'nde nemâzını edâ ve hazret-i Hâlid civârında mukaddemâ ihzâr etdikleri lahde o dürr-i ʿakīleyi idhâl ile vedîʿa-i cenâb-ı Hudâ eylediler.