Şerîf-i Mekke tarafından pey-der-pey teceddüd eden ahbâr iktizâsıyla Vehhâbîler'in Medîne-i münevvere'ye tesallutları ihtimâl-i karîb ve bu takdîrde o arz-ı mukaddeseyi gezend-i hasm-ı ebleh-firîbden muhâfaza, tasvîb-kerde-i her hûş-mend ü erîb olup, efrâd-ı müteʿayyineden birinin rütbesi terfîʿ ve dâiresi asker ve cihet-i uhrâ ile tevsîʿ olunup, husûl-i kudret-i tâmme ʿakabinde ol savb-ı şeref-evbe tesyîr olunmak lâzım gelmişidi. Binâʾen-ʿalâ-zâlik mukaddemâ tasmîm olunan Saʿîd Ağa'nın o tarafda asker cemʿ etmek ve ʿadem-i tecribe ile emr-i muhâfazada kusûr eylemek [V 51b] ezhân-ı evliyây-ı [Ü4 179b] devlete hadşe-resân ve âharının bu hatb-ı ehemme taʿyîni muvâfık-ı vakt ü şân olmağla, ʿan-asl İç-il müteʿayyinlerinden olup, Rütbe-i Mîr-i mîrânî ile Mısır seferinde istihdâm ve derece-i kābiliyyeti mücerreb-i Sadr-ı vâlâ-mâkām olan Ahmed Paşa'nın Vezâret'e liyâkat ü istihkākı zâhir ve emr-i muhâfazada izhâr-ı mesâʿî-yi vâfire ile kuttân-ı Tîbe-i tayyibenin istihsâl-i ârâmiş-i bâllerine takyîd edeceği zihne mütebâdir olmağla, keyfiyyet, hâk-i ʿatebe-i Mülûkâne'ye ʿarz u inhâ olunup, hakkında müsâʿade-i seniyye rû-nümâ ve dâhil-i silkü'l-le'âl-i vüzerâ olup, mukaddemâ meclis-i meşveretde zebân-güzâr-ı erbâb-ı ʿizz ü iʿtibâr olduğu vech üzere iktizâ eden asâkir ve sâyir umûrunu Mısır Vâlîsi Vezîr Husrev Paşa ruʾyet ve bir ân akdem me'mûr olduğu savb-ı eşrefe tahrîk ile lâzime-i hazm ü ihtiyâta riʿâyet eylemesi tahrîr ü işâret olunmuşidi. Müşârun ileyh tıbk-ı irâde-i Devlet-i ebed-müddet üzere müşârun ileyhin tesviye-i umûruna berzede-dâmân-ı ikdâm olacağını bu defʿa ifhâm ve karîbü'l-ʿahdde tekmîl-i mehâmm-ı lâzimü'l-ihtimâmıyla savb-ı maksûda tesyîrini iltizâm edüp, müşârun ileyhin diyâr-ı Mısriyye'den tebâʿüdü hasebiyle baʿzı umûr-ı mütehattimetü'l- i‘tinâda lede'l-iktizâ istihdâm olunmak içün bir şahsa teʿayyün ü teşahhus verilmesini müşârun ileyh mûcibât-ı maslahatdan ʿadd eylediğine binâ'en, bundan akdem Cerde Başbûğluğu hıdmetinde izhâr-ı mâye-i fütüvvet ve el-yevm Mısr-ı Kāhire'de vukūʿ bulan şu'ûn-ı hatîrede ibrâz-ı dest-mâye-i sadâkat eden İbrâhîm Ağa'ya o tarafda Mîr-i mîrânlık hilʿatini iksâ ve Ahmed Paşa'ya bedel ittihâzıyla rütbesini [Ü4 180a – V 52a] terfîʿ ü iʿlâ eylediğini bu defʿa inhâ ve tasdîk-ı rütbesini hâvî emr-i celîlü'ş-şân sudûrunu istirhâm ü istidʿâ etmekle, niyâzı karîn-i isʿâf ve mûmâ ileyhin Mîr-i mîrânlığı te'kîd olunarak, müşârun ileyhin nüfûzu ikmâl ü izʿâf olundu. Cidde Vâlîsi nasb olunan Vezîr Şerîf Mehmed Paşa'nın me'mûriyyet emrini îsâle taʿyîn olunan Kapucu-başı Mustafa Ağa, ihtilâf-ı hevâ ile henûz Mısır'a varamayup, bir ân akdem Cidde'ye vusûlü dahi mühimm olduğundan, mukaddemâ taraf-ı vâzıhu'ş-şeref-i hazret-i Sad[a]ret-penâhî'den irsâl olunan tebşîr-nâme hükmü üzere Mısır Vâlîsi Husrev Paşa müşârun ileyhin dâyiresini tanzîm ve mühimmât ve top ve Mısır'dan tertîbi irâde olunan asker ile kâffe-i umûrunu tetmîm edüp, Zilkaʿde'nin on birinci günü ʿAzeb-kubbesi'nde kâ'in ordusunu tahrîk ve peyvend-i ikāmetini tefkîk edüp, Süveys tarafına râhile-bend-i iʿtizâm olduğunu Vezîr-i müşârun ileyh tahrîr ü iʿlâm eyledi. Mısr-ı Kāhire tarafından beher sâl ihrâc olunan Mîrü'l-Hâcc her seneden ziyâde asker ve mühimmât ile hareket etmek, zarûriyyât-ı vakt ü hâlden olduğunu müşârun ileyh semîr-i zâmîr edüp, kesret-i mesârıfa bakmayarak, sevâlif-i ezmândan füzûn-ter mühimmât ve asker ile Mîrü'l-Hâcc-ı mûmâ ileyhi cânib-i Hicâz'a tesyîr ve bu bâbda dahi sâk-ı gayret ü hamiyyeti teşmîr eylediğini tahrîr eyledi. Müşârun ileyhin aktâr-ı Hicâziyye umûruna dâ'ir levha-tırâz-ı sünûh olan gayret ü ikdâmı mûcib-i tahsîn ve şâyeste-i sad-âferîn olduğu taraf-ı Sadru's-sudûr'dan işʿâr ve fîmâ-baʿd şevârid-i ahvâl-i Mısır ve Hicâz'ın ber-vefk-ı me'mûl tensîk [Ü4 180b] u tanzîmi husûslarına mezîd-i iʿtinâ vü dikkat eylemesi tarafına tezkîr ü ihtâr olundu.