Fransızlar ile musâlaha vukūʿundan sonra, İskenderiyye'de ber-vech-i [Ü4 177a] müsâferet ikāmet üzere olan İngilizlü'nün memleketlerine ʿazîmetleri muntazar iken, kavm-i mezkûrun ru'esâsı Mısır ümerâsını mukaddemâ li-emrimmâ istishâb ile bir mahalde iskân u îvâlarını iltizâm ve Devlet-i ʿaliyye tarafından gûnâ-gûn iltizâmât îrâdıyla müşâhede-i sûret-i mümâşât etmediklerinden, nâ-çâr vilâyetlerine doğru ʿazîmete tavtîn-i nefs eyledikleri haberi, karʿ-ı semʿ-i ashâb-ı nakz u ibrâm etmişidi. Binâ-berîn Françelü'nün bundan akdem İskenderiyye'de iktizâsıyla terk eyledikleri mühimmâtı İngilizlü ber-mûceb-i defter muhâfız bulunan Hurşîd Paşa'ya teslîm ve kendülerinin sefâyine vazʿ u idhâl edemeyüp, [V 51a] behâsını tahmîn ü takvîm ve beyʿa ʿarz etdikleri eşyâ ve hayvânâtı kezâlik Paşa-yı mûmâ ileyhe tevdîʿ ile maslahatlarını tetmîm etdikden sonra, müteheyyi’-i hareket ü nehzat ve yirmi dokuz kıtʿa kebîr ve sagīr sefâyine rükûb ile Malta Cezîresi'ne teveccüh ve ümerây-ı Mısrıyye'nin müteşahhıslarından Elfî Mehmed Bey dahi kavm-i mezkûr ile ʿazîmet etdiğini baʿzı kimseler nükūl u tefevvüh eylediler. İngiliz askerinin Bender-i İskenderiyye'de bu âna dek meks ü ikāmetleri gavâmız-ı umûr-ı düvelden bî-haber olan sâde-dilân-ı rûzgârın baʿzısını pür-havf u bîm ve belki havâss-ı nâsı bile tahdîş ü tevhîm etmişiken, bu esnâda merkūmların o tarafdan hareket ve el-hâletü hâzihî cemʿiyyet-gâhları olan Malta Cezîresi'ne şirâʿ-güşây-ı ʿazîmet oldukları haberinin tevârüdü, bâʿis-i inkişâf-ı kulûb-ı hâss u ʿâmm ve sebeb-i zevâl-i endîşe vü evhâm oldu. [Ü4 177b]