Bundan akdem Vezâret'i ibkāsıyla İnebahtı muhâfazası tevcîh olununa Vezîr Halîl Paşa'nın Anadolu'da bir mansıb tevcîhiyle Rumeli'nden tebʿîdi nezd-i erbâb-ı istidlâlde muvâfık-ı vakt ü hâl mülâhaza olunduğuna binâ'en, mâh-ı Zilkaʿde'nin onuncu günü Karahisar-ı sâhib ve Sultân-önü sancakları tarafına tevcîh olunup, münhall olan İnebahtı muhâfazasına sâbıkā [Ü4 176b] Karahisar Sancağı Mutasarrıfı Vezîr es-Seyyid Mûsâ Paşa me'mûr ve Adana Eyâleti ilhâkıyla İznikmid Mutasarrıfı Vezîr ʿOsmân Paşa mesrûr oldu. Bundan akdem Rumeli Vâlîsi nasb olunan Filibeli Çelebi ʿÖmer Paşa, tevfîk-ı Hakk'dan mahrûm ve cânib-i mîrîyi izrâr-ı küllî ile bir hıdmete yaramadığı maʿlûm olduğundan gayri, Anadolu Vâlîsi nasb olundukda, Kütahya hânedânından Germiyân-zâde'yi hevâsına ʿadem-i muvâfakat hasebiyle bi-gayr-i hakkın iʿdâm ve fukarâ vü zuʿafâyı ihâfe ve birer sebeb ile ithâm edüp, emvâl ü eşyâlarını dest-bürd-i ciyâʿ-ı etbâʿ [V 50b] eylediği, bî-garaz kimselerden istimâʿ olunmağla, müşârun ileyhden hılâf-ı me'mûl ser-zede-i zuhûr olan tavr-ı gayr-i makbûl, tagyîr-i tabʿ-ı Şehriyâr-ı İskender-cenâb ve lâyıkı üzere te'dîb ü gûşmâlini îcâb etmekle, emvâl ü eşyâsı müsâdere ve kendüsi Bender-i İzmir'de merfûʿu'l-Vezâre ikāmet etmek bâbında emr-i ʿâlî isdâr ve Dergâh-ı ʿâlî kapucu-başılarından Haffâf-zâde Ahmed Ağa mübâşereti ile tesyâr olunup, mûmâ ileyh icrây-ı me'mûriyyet ve emvâl ü eşyâsını mîrî içün zabt ve İzmir'e îsâl ʿakabinde Âsitâne-i saʿâdet'e ʿavdet üzere olduğunu tahrîr ü işâret eyledi. Yafa'da bir müddetden berü mukîm olan Vezîr Mehmed Paşa'ya Diyârbekir Eyâleti tevcîh ve müteʿâkıben Yafa'dan hareket ve mansıbı tarafına ʿazîmeti tenbîh olunmuşidi. Müşârun ileyh emr-i ʿâlî'ye imtisâl ve bahran Lâzikıyyetü'l-ʿArab'a çıkdığını hâvî tahrîrât irsâl eyledi.