Tâyife-i mezkûre Rumeli Vâlîsi Vezîr Depedelenli ʿAli Paşa'nın bundan akdem ceyş-i kesîf ile üzerlerine me'mûriyyetinden hâ'if ü tersân ve ʿan-asl serserî geşt ü güzâr ile bî-râhat u sâmân olduklarından, sâlik oldukları tecâvüz ü teʿaddîden nâdim ü peşîmân olmalarıyla, hatî'ât-ı sâbıkalarından inâbet ü istiğfâr ve fîmâ-baʿd iskân olunacakları mahallerde ʿirz u edebleriyle istikrâr edeceklerini müşârun ileyhe işʿâr eylediklerinden gayri, müteʿayyinlerinden üç yüz kadar kimseyi rehin tarîkıyla teslîm ve bu şurût ile esbâb-ı istîmânı tahkîm ve bu keyfiyyet ʿale't-tafsîl müşârun ileyh tarafından hâk-i kadem-i Şâhâne'ye ʿarz u inhâ ve iltimâsına sûret-i müsâʿade-i seniyye rû-nümâ ve tâyife-i mezkûre münâsib olan mahallerde iskân ü îvâ olundukları bâlâda sebt ü imlâ olunmuşidi. Ancak mezbûrlara kemâl-i emniyyet hâsıl olmadığından, mukaddemâ dâire-i mefsedetlerine idhâl eyledikleri ecânibi cemʿiyyetlerinden tefrîk etmeyüp, hey'et-i mecmûʿalarıyla taʿyîn [Ü4 176a] olunan mahallerde temekkün ve o kadar nüfûsu kazâlar halkı idare edemeyecekleri tebeyyün edüp, bi'z-zarûre fukarâyı izrâra mecbûr ve ʿan-asl tereffüh ve celb-i mâla me'lûf olduklarından, ednâ maʿîşete kāniʿ olmayup, fursat buldukça ebnâ'-i sebîli dahi nehb ü gāret eyleyecekleri ihtimâlât-ı ʿakliyyeden olmağla, Rumeli'de kâyin müteneffisân-ı memleket bir mahalde ʿakd-i cemʿiyyet edüp, tâ'ife-i mezkûre miyânında olan yerlüleri temyîz ü tefrîk ve ecânibi tard u izâha ile sûret-i ilzâmda râbıta-i nizâmlarını tevsîk etmeleri lâzım gelmekle, ber-minvâl-i muharrer [V 50a] keyfiyyet Siroz ve Gümülcine ve sâyir Rumeli hânedânına beyân ve Rumeli Vâlîsi Vezîr ʿAli Paşa tarafına dahi ısdâr-ı fermân olunduysa dahi, bu keyfiyyete nezâret ile fukarâ vü zuʿafâdan defʿ-i mazarrat etmek üzere eʿâzim-i ricâl-i Devlet-i ʿaliyye'den bir zât-ı müteşahhısın taʿyîni iktizâ eylediğine binâʾen, hâlâ Ser-çavûşân-ı Dergâh-ı ʿâlî olan ʿOsmân Efendi bu hatb-ı ehemme intihâb ve me'mûriyyeti şifâhen ifade olunduğundan fazla, bu keyfiyyâtı şâmil bâlâsı hatt-ı hümâyûn-ı mehâbet-makrûn ile müveşşah yedine emr-i ʿâlî verilüp, harc-ı râh ve sâyir levâzımı ru'yet olunarak mecmaʿ-i ittihâz olunan mahalle izhâb olundu.