Mekke-i mükerreme Kazâsı Pâyesi'yle meşâhîr-i mevâlî-yi ʿizâmdan olan İsmâʿîl Müfîd Efendi, gül-zâr-ı nâ-pâydâr-ı rüzgârda bir zemân gülçîn-i ʿömr-i nâzenîn ve râdde-i ʿömrü mütenâhiz-i ʿakd-i hams ve semânîn oldukda, ʿâzim-i serâbistân-ı huld-i berîn olup, Davud-paşa Câmiʿi Hazîresi'nde defn ile o tavd-ı bâzıh-ı fazl ü ʿirfân, aʿyün-i nâsdan pûşîde vü pinhân oldu. Mûmâ ileyh câmiʿ-i mezkûr kurbünde sâkin "Attâr ʿAli" nâm kimesnenin sulbünden bin yüz otuz iki târîhinde zuhûr edüp, fark-ı zemîn ü âsumân ve temyîz-i tâmm [Ü4 173a] u noksân eyledikde, refte refte mukaddimât-ı ʿulûmu tahsîl ve Eğri-kapulu ve sâyir hattâtlardan temeşşuk ile san'at-ı kitâbeti ahsen-i nesak üzere tekmîl etmişidi. Muhaddis Kudsî Efendi'den ʿilm-i hadîs-i şerîfi ahz u telakkī ve Akkermanî Efendi'nin dersine müdâvemet [V 47a] ile yevmen-fe-yevmen rütbe-i haysiyyeti kesb-i terakkī edüp, Konevî İsmâʿîl Efendi'den me'zûn ve tahsîl-i ruhsat-ı neşr-i ʿulûm ile rütbe-i kadr ü iʿtibârı efzûn olmuşidi. Mir'ât-ı tabʿı meclây-ı suver-i hakīkat olmağa müstaʿidd ve yekke-süvârân-ı meydân-ı tarîkat-ı ʿaliyyenin birinden müstemidd olmak üzere bârika-i şevk u ʿizâmı mütevakkıd olup, civâr-ı hazret-i Hâlid'de tehzîb-i ahlâk ile tekmîl-i nefs ve tahsîl-i rızây-ı Hakk zımnında sarf-ı yevm ü ems eden ser-i tarîk-ı Nakşîbendî Nidâyî Şeyh Abdullah Efendi'den inâbet ve iktisây-ı hırka-i vecd ü mahabbet edüp, izniyle dâhil-i silk-i ʿulemây-ı rüsûm ve yetmiş iki senesi imtihanında mâhiyyeti maʿlûm ve neyl-i ru'ûs ile mazhar-ı lutf-ı cenâb-ı Kayyûm olup, iki yüz bir senesinde Kazâ'-ı Üsküdâr ile mükerrem ve on bir târîhinde Edirne Kazâsı'yla dilşâd u hurrem olup, gazâret-i ʿilm ü fazlı resîde-i sâmiʿ-i hümâyûn ve Mekke-i mükerreme Pâyesi'yle mutayyeb ü memnûn oldu. Eyyâm-ı sayfda Anadolu Hisârı'nda vâkiʿ sâhilhânesinde ve eyyâm-ı şitâda menzilinde neşr-i ʿulûm ve tasnîf-i kütüb ile iştigāl ve ʿömrü girân-mâyesini ʿadem-i tazyîʿ ile “Hayru'n-nâs men yenfaʿu'n-nâs” emr-i celîline imtisâl edüp, Ramazân-ı şerîf'de ʿillet-i şeyb ü herem, matıyyetü'l-ʿilm olan vücûd-ı bihbûdunu mübtelây-ı derd ü sekam eyleyüp, Şevvâl'in beşinci günü ders-i nüsha-i ʿömrünü [Ü4 173b] itmâm ve makʿad-ı sıdka hırâm edüp, haber-i mevtini istimâʿ eden erbâb-ı fazl u ʿirfân, “Mevtü'l-ʿâlimi mevtü'l-ʿâlemi” mefhûmu üzere ıtlâk-ı zimâm-ı nâle vü figān ve hasret-i fikdânıyla çâk-ı girîbân eylediler. Müteveffây-ı mûmâ ileyh ʿulûm-ı şettâda bahr-ı zâhır ve meʿârif ü kemâlâtda hâyiz-i kasabü's-sebak-ı [V 47b] “Kem tereke'l-evvelü li'l-âhir” olup, muhaddis-i sahîhu'l-isnâd ve mütekellim-i pâk-iʿtikād, şiʿr ü inşâya kādir, salâh-ı hâl ve nekāy-ı bâl ile müştehir idi. Erbaʿîn-i İmâm Nevevî ve Delâyilü'l-Hayrât ve Şemâ'il-i Şerîfe ve Ahlâk-ı ʿAdudiyye'ye birer şerh-i metîn yazup, mutâlaʿa edenlere gazâret-i ʿilm ve ittisâʿ-ı maʿlûmâtı zâhirdir. Bundan başka Tefsîr-i Beyzâvî ve müstakıllen Nebe' Sûresi'ne hâşiye tahrîr ve niçe dekāyık u hakāyık îrâdıyla sened-i mâhiyyetini tenvîr eyledi. Nûniyye ve Bürde-i Şerîfe'yi dahi şerh eylediğinden gayri, Şerh-i Fenârî ve ʿİsâm İstiʿâre'si ve Taşköprü-zâde'nin Âdâb Şerhi üzerine taʿlîkātı olup, İbn-i Melek'in Menâr Şerhi'ni ve Kenzü'l-ʿUmmân'ı ihtisâr ve Kudûrî ile Fıkh-ı Keydânî'yi ve Câmî'nin Levâyih'ini Türkî'ye terceme ile zâtına vedîʿa-i Hakk olan tasarrufât-ı ʿilmiyyeyi vâreste-i kayd-ı tevârî vü istitâr eyledi.