Tefâsîl-i ahvâlî maʿlûm-i esâfil ü eʿâlî olan Vezîr Gürcü ʿOsmân Paşa'ya mukaddemâ Silistre Eyâleti ʿinâyet olunup, o tarafa hatve-cünbân-ı ʿazîmet olmuşidi. Müşârun ileyhin kapusu halkı mükemmel ve sevret-i sâbıkası, il ve memleket halkını matmûre-nişîn-i havf u vecel edüp, Silistreli her hâlde irâde-i Şâhâne'ye gerden-pîç-i tavk u inkıyâd olduklarını ifâde ve sâyir vüzerây-ı ʿizâm gibi muʿtedil dâyire ile şehre duhûlünü iltimâs u irâde etmişler idi. Müşârun ileyhe henûz tuma'nînet-i küllî hâsıl olmadığından, tefrîk-ı etbâʿ u havâşîden mütecânif ve ehâlî dahi kesret-i dâyiresinden tevellüd edecek teʿaddiyyât u mezâlimden hâyif ve iki taraf bu hâl-i ʿacîb ile âvâre-i deşt-i hayret oldukları, maʿlûm-i Şehriyâr-ı İskender-maʿdelet olup, tarafeyni tervîh kasdıyla şehr-i Ramazân-ı şerîf'in beşinci günü ʿOsmân Paşa'ya Anadolu Eyâleti tevcîh ü ʿinâyet ve Silistre mansıbı, Vezîr Yûsuf Paşa'ya ihsân olunup, üslûb-ı hakîmâne ile gāyile-i mezkûrenin indifâʿına mübâderet olundu.