Birkaç gün mukaddem Hanya muhâfazası tevcîh olunan Vezîr Mustafa Paşa baʿzı emrâz-ı cân-güdâz ile sahrây-ı fesîhu'l-ercây-ı ʿukbâya ʿalem-efrâz olup, mansıbı mahlûl ve muhâfaza-ı mezkûreye birinin taʿyîni re'y-i maʿkūl olduğuna binâ'en, Dergâh-ı ʿâlî kapucubaşılarından olup, hâlâ Cebeci-başı bulunan ʿOsmân Bey, ʿan-asl Vezîr-zâde ve vekāyiʿ-i Mısrıyye'de ikdâm ü gayreti ferâde ferâde maʿlûm-i Sadr-ı mekârim-ʿâde olduğuna binâ'en, kemâl-i istihkāk u istîhâli, bâ-takrîr hâk-i kadem-i hazret-i Cihân-bânî'ye niyâz-gûne ifâde olundukda, ʿarz-ı cenâb-ı Sadâret-penâhî'ye müsâʿade olunup, Şaʿbân-ı şerîf'in yirmi birinci Cuma günü esbâb-ı Vezâret'i Bâb-ı ʿâlî'de âmâde kılındıkdan sonra, daʿvetine âdem firistâde olunmuşidi. Mîr-i mûmâ ileyh daʿvete icâbet ve huzûr-ı Sadru's-sudûr'da iktisây-ı hilʿat-ı Vezâret ve Hanya Muhâfızlığı ile iktisâb-ı [Ü4 170a] mâye-i meserret eyledi.