Müşârun ileyh ʿale'd-devâm Rütbe-i Vezâret'e irtikāy-ı nükāve-i merâm edüp, taleb-i meʿâlî ile teveccüh ü ikdâm, ʿâkıbet husûl-i matlabına ʿillet-i tâmm oldu. ʿÂciz olan [V 41a] kimse kesel ü batâleti tevekkül ve kasr-ı himmeti kanâʿat ʿaddiyle izhâr-ı teseffül edüp, bilmez ki, bülendî-himmet ve irtiyâd-ı ʿizz ü rifʿat ile bezl-i niʿmetden atyeb makām yokdur. Zîrâ kuʿûd-ı ahlâk, havâlifden ve kanâʿat, tibâʿ-ı bühümdendir. Derecât-ı himeme iʿtilâ, ʿuyûn-ı ümemde şahsı müteʿazzim ü bâlâ gösterüp, sâhibini niçe umûr-ı hayriyyeye ʿillet ve sunûf-ı mehâsin-i aʿmâle âlet eder. Biz yine sadede gelelim. Münhall olan Cebeci-başılık dahi Haleb Kethudâsı-zâde Kapucu-başı Saʿîd Ağa'ya tevcîh ü ʿinâyet ve ol dahi memnûn-i lutf u mürüvvet kılındı. Mütevaffây-ı müşârun ileyh Sadr-ı esbak Hazînedâr ʿAli Paşa'nın Hazînedâr'ı olup, Paşa'sı vefâtından sonra iki yüz iki seferinde Vezîr Ağa Hasan Paşa'ya Kethudâ ve Kapucu-başılık Rütbesi'ne pâ-nihâde-i iʿtilâ olup, sefer ʿavdetinde Lağımcı-başı, baʿdehû Mora Muhassılı ve iki tûğ ile kadri müstaʿlî olup, çok geçmeden Vezâret'e nâyil ve merreten-baʿde-uhrâ Mora Muhassıllığı ile hilâl-i iʿtibârı bedr-i kâmil olmuşidi. Târîh-i mezkûrda İnebahtı'dan Hanya tevcîh olunup, kable'l-hareke fezleke-i ʿömrü hitâm ve aʿdâd-ı enfâsı encâm buldu. Müşârun ileyh Gürcî-nijâd, pâk-i iʿtikād, mütedeyyin ü sâlih, akrânına râcih, seyr ü hareketi muktesid ve siniyy-i ʿömrü derece-i sittîne müstenid idi.