Cebe-hâne-i ʿâmire'nin ekser mahalli müşrif-i vehn ü indirâs ve taʿmîr ü termîme ihtiyâcı ezherun min-nûri'n-nibrâs olduğuna binâʾen, muhtâc-ı binâ ve taʿmîr olan mahalleri keşf ü tebyîn ve hâcegân-ı Dîvân-ı hümâyûn'dan Tâhir Ağa-zâde Mehmed Emîn Efendi Binâ Emîni taʿyîn olunmuşidi. Şaʿbânü'l-muʿazzam'ın on ikinci Çehârşenbih gicesi sâʿat altıda iken nâ-gâh ağalara neşmîn-gâh olan mahalden âteş zuhûr edüp, Cebe-hâne'yi ve ittisâlinde olan Arslan-hâne'yi ve fevkinde olan Nakkāş-hâne'yi ihrâk ve hâkile yeksân ve karşusunda kâyin ʿiffetlü Hadîce Sultân hazretlerinin serâyına sirâyet etmişiken, me'mûr-ı ıtfây-ı nâr olanların ihtimâmıyla ancak bir-iki oda sûzân olup, andan kapu mukābilinde bulunan dükkânlar ile Ayasofya Hammâmı'nı ve İkinci Kahveci-başı hânesinin saçaklarını yakup, sâʿat birde itfâ-kerde-i fazl-ı Sübhân oldu.