Françelü tarafına bundan [Ü4 166b] akdem sefâretle taʿyîn olunan Âmedî Gālib Efendi'nin yedinde olan taʿlîm-nâme mûcebince ʿakd etdiği şurût-ı muhâdene bâʿis-i tahsîn ve bir mansıb ile kadri terfîʿ olunmak tahmîn olunup, evâsıt-ı Şaʿbânü'l-muʿazzam'da mûmâ ileyh Âsitâne'ye hatt-ı rahl-i vusûl ve rişte-i intizârını bend-i peyvend-i me'mûl etmişidi. Tezkire-i Evvel bulunan Ahmed Bey'in ʿillet-i mizâcı kabûl-i zemânet ile ekser-i ahyân Kapu'ya gelmemesi refîkına bâʿis-i suʿûbet olup, ʿazli ʿan-asl menvî-yi zamîr ve Gālib Efendi'nin ber-vech-i muharrer tatyîbi, kulûb-ı evliyây-ı umûrda cây-gîr olmağla, cemʿ-i fâyideteyn kasdıyla mûmâ ileyh Tezkire-i Evvel hidmetiyle mübeccel ve Mektûbî hulefâsından olup, nihâl-i maʿrifeti gün-be-gün nemâ-dâr olan ʿİzzet Bey, Âmedçilik hıdmetiyle nâyil-i nuhûstîn-i pâye-i emel oldu.