Mukaddemâ Vehhâbiyân mâddesiyçün münʿakıd olan meşveretde bugāt-ı mezkûrenin garazlarını bu tarafdan teʿallüm etdiği üzere tefehhüm ve kuvve-i kāhire-i Saltanat-ı seniyye'yi beyân ve ʿulemâsıyla bahs ü tekellüm ederek, [V 37a] miyâneden refʿ-i şikāk ve celb-i mâye-i vifâk [Ü4 166a] etmek üzere ʿilm ü edebi zâhir ve muhâcce vü muhâvereye kudreti bâhir tarîk-ı ʿulemâdan birinin irsâli savâb-nümây-ı erbâb-ı basâyir olmuşidi. Müderrisîn-i kirâmdan Erbiliyyü'l-asl ve Halebiyyü'l-menşe' olan Âdem Efendi'de bu kâr-ı düşvârın nizâmına liyâkat mülâhaza olunmağla, Altmışlı Müderrisi iken iki yüz on dokuz Muharrem'inden mutasarrıf olmak üzere Edirne Pâyesi'yle Kudüs Kazâsı tarafına tevcîh olunup, Receb-i şerîf'in yirmi yedinci günü emr-i şerîfi yedine teslîm ve harc-ı râhı mîrîden tanzîm olunup, birkaç gün zarfında mühimm-sâz-ı şevârid-i igtirâb ve cânib-i Necid'e cemmâze-rân-ı ʿazm ü zehâb oldu.