Bir müddetden berü merfûʿu'l-Vezâre Tekfûrdağı ve Gelibolu'da müstevfâ meʿâş ile ikāmet ü intiʿâş eden Halîl Paşa, Bergos imdâdı nâmıyla mahallinden bilâ-istîzân hareket ve dağlu eşkıyâsı derûnuna varup, ne mahalle vardılar ise mezbûrlar ile mürâfekat etmişidi. Tâyife-i mezkûre hâlâ Rumeli Vâlîsi Vezîr ʿAli Paşa cânibine medd-i eyâdî-yi istirhâm ve bâlâda tafsîl olunduğu vech üzere sebkat eden cürm-i ʿazîmleri pûziş-pezîr-i Şehriyâr-ı enâm olarak her fırkasına başka başka taʿyîn-i makām kılınmışidi. Halîl Paşa dahi ahad-i ebnây-ı muʿterik ve mâdde-i ʿafva sehîm ü müşterik olup, bir sancak ile kayırılması Rumeli Vâlîsi müşârun ileyh tarafından niyâz-gûne tebliğ ve ilticâsına müsâʿade tesvîg olunup, evâyil-i Şaʿbânü'l-muʿazzam'da Vezâret'i ibkā ve İnebahtı muhâfazasıyla kadri kemâ-fi'l-evvel iʿlâ ve selefi Vezîr Mustafa Paşa dahi Hanya muhâfazasına isrâ olundu.