Ahısha Vâlîsi Şerîf Paşa ne sûretle tîğ-i siyâsetden ser-dâde-i vâdî-yi halâs ve Ahısha'yı tegallüben istihlâs eylediği mukaddemâ ber-vech-i tafsîl, çekîde-i kalem-i ʻAbd-i zelîl olmuşidi. Müşârun ileyhin husamâsı bu esnâda kesb-i kuvvet ve birkaç defʿa askerine irâ'e-i rûy-i hezîmet eyleyüp, Ahıshalı dahi iʿânetden dâmen-çîn ve zevâline fursat-bîn olup, iʿânetden me'yûs ve galebe-i husamâ ile livây-ı sevreti menkûs olduğundan, Ardahan Kalʿası'na firâr ve Kalʿa Dizdârı sedd-i bâb ile mümânaʿat işʿâr etmekle, nâ-çâr Oltu'da karâr eylediğini Fars Muhâfızı ve Erzurum Vâlîsi tahrîr ve irâde-i [V 35a] devleti istihbâr eylediler. Müşârun ileyhin tebeʿât-ı sâbıkası zâhir ve tekrârı mümill-i havâtır olup, pâdâş-ı aʿmâli olarak [Ü4 164a] cezâsı tertîb olunmak bâbında Erzurum Vâlîsi'ne ve sâyire hitâben emr-i kazâ-mâza ısdâr ve mahall-be-mahall neşr ü tesyâr olundu. Müşârun ileyhin Oltu'da ikāmeti Ahısha'ya duhûl esbâbının tedârüküne mübtenî olup, sebeb maʿdûm ve üzerine asker taʿyîn olunacağı emr-i meczûm olduğundan, gözden nihân ve sîne-kûb-ı hasret olarak ser-dâde-i vâdî-yi husrân oldu. Bu takdîrde Eyâlet-i Çıldır, Vâlî'den hâlî kalup, Sivas Vâlîsi iken Mısır seferinde Vezâret'i refʿ olunan Zereli-zâde Vezîr Receb Paşa'nın tûğ ve sancağı ibkā ve eyâlet-i mezkûre ile dil-i mürde-i emeli ihyâ olundu.