İngilizlü'nün İskenderiyye'yi şimdiye dek terk ve memleketlerine ʿazîmet etmameleri, ümerâ'-i Mısrıyye'yi İngilüz ceneralleri istishâb ile Saʿîd ve yâhûd Mısır iklîminin âhar mahallinde tavtîn olunmalarına mebnî olduğu zevâhir-i ahvâle nazaran tekarrur edüp, o makūle fitne-engîz ve zalemenin diyâr-ı Mısrıyye'de ibkā vü îvâları mesâlih-i Devlet-i ʻaliyye'ye min külli'l-vücûh muzırr u mahzûrdan hâlî olmadığı, bu cânibde mukīm elçilerine her ne kadar ifâde olunduysa dahi müfîd olmayup, ceneraller bu bâbda söz verdiklerini îmâ ile jaj-hâ olduğundan katʿ-ı nazar, [V 34b] İngilüzlü'nün İskenderiyye'de sebeb-i vâhî ile temekkünü o tarafda bulunan müstahfızân-ı devlet ile gâh u bî-gâh ednâ mâdde içün ihdâs-ı nizâʿ eyleyecekleri [Ü4 163b] bî-iştibâh ve bu vazʿ-ı garîbleri sebeb-i ihtilâc-ı kulûb-i erbâb-ı intibâh olduğundan, huzûr-ı Sadru's-sudûr'da bu mâdde içün bir meclis-i hâs tertîb ve müzâkereye şurûʿ ile evrâk-ı ezhân taklîb olunup, ümerâ mâddesinde olan hücnet ve iskânlarında olan ʻillet bu defʿa İngilüzlü'ye ber-vech-i tafsîl tahrîr u işâret olunmak ve metâlib-i Devlet-i ʻaliyye'yi ifâde ile tarîk-ı ilzâm u muhâcceye kādir bir kimse taʿyîn kılınmak savâb-dîd-i ehl-i meşveret olmağla, zikr olunan tahrîrât ile hâcegân-ı Dîvân-ı hümâyûn'dan Sıdkī Efendi'nin İngilterelü'ye me'mûriyyeti istihsân ve mâ-lezimesini ruʾyet ile ʿazîmete teheyyü'ü fermân olundu.