Bir zemândan berü Yeniçeri Ağası olan Ahmed Ağa'nın vücûdunda ʿillet ve fiʿlinde rehâvet ile kemâ hüve'l-me'mûl edây-ı hidmet edemeyüp, Cumâdelûlâ'nın on dokuzuncu Cuma günü ʿazl ve birkaç gün zarfında Ocak ve sâyir nâs ile olan dâd ü sitedi katʿ u vasl olunup, Burusa'da ikāmeti fermân ve Segbân-başı es-Seyyid Halîl Ağa, Yeniçeri Ağalığı'yla ferhân kılınup, Segbân-başılık, bi'l-fiʿl Kul Kethudâsı olan ʿOsmân Ağa'ya ve anın yeri Zağarcı-başı Üsküdârî İbrâhîm Ağa'ya ve anın yeri Seksoncu-başı olan ʿAlî Ağa'ya ve Seksonculuk, Turnacı-başı ʿÖmer Ağa'ya ve anın yeri Bâb-ı ʿâlî'de Muhzır bulunan ʿOsmân Ağa'ya ve yirmi dört bölüğün Çorbacısı Hacı Süleymân Ağa, üç âdeme tekaddüm ile Muhzır nasb olunup, silsileleri bu vechile tertîb ve her biri kesb-i merâtib ve tecdîd-i menâsıb ile sâye-i hemâ-vâye-i Şâhâne'de memnûn-ı hazz u nasîb kılındı. Ağa-yı cedîdin Ordu-yi hümâyûn Mısr-ı Kāhire'de iken Segbân-başılığı Cumʿa gününe ve bu defʿa Ağalığı yevm-i mezkûra tesâdüf etmesi, hakkında hayret-fâline sebeb olmuşdur.