Bundan akdem Eyâlet-i Sivas tevcîh olunan Zühdî Paşa'ya haber-i mansıb varmazdan mukaddem esâs-ı zindegânîsi mütezelzil ü muztarib ve mâhiyyet-i hayâtı mevte münkalib olup, münhall olan Sivas Eyâleti, Karaman Vâlîsi Vezîr [Ü4 146a - V 17a] ʿAlâʾeddîn Paşa'ya ve Karaman Eyâleti, İznikmid Sancağı Mutasarrıfı Melek Ahmed Paşa-zâde Vezîr ʿOsmân Paşa'ya ve İznikmid Sancağı, Mîr-i mîrân'dan Tâhir Paşa'ya tevcîh ü ʿinâyet ve her biri neyl-i matlab u bagyet ile memnûn-ı lutf ü mekremet kılındı. Müteveffây-ı müşârun ileyh Mîrâhûr-ı Evvel iken hücûm-ı iztirâb u nâ-tüvânî ile tâlib-i Vezâret olup, bir zemân Karaman Eyâleti'nde teskîn-i evâm-ı merâm ve baʿdehû Diyârbekir Eyâleti'ne ʿatf-ı zimâm edüp, vehâmet-i hevâ ve kurb-i ecel, katʿ-ı merâyir-i emel eyleyüp, nâ-kâm u nâ-murâd işbu Cumâdelûlâ evâsıtında ʿazm-i serâbistân-ı meʿâd eyledi. Siniyy-i ʿömrü ʿakd-i hamsîne mevsûl olduğu hâline vâkıf olanlardan menküldür. Müşârun ileyh ümmî-yi ʿâmî iken, meclise münâsib söz bulmakda ve darb-ı nutk ile muʿârızını ilzâm etmekde nazîri nâ-yâb idi. Mîrâhûr-ı Evvel iken Kapucular Kethudâsı bulunan Şemseddîn Beyefendi'nin şiddet-i ittisâlini bilüp, mîr-i mûmâ ileyhden müsteşʿir ve mansıbına tâlib olduğunu dâyimâ mütefekkir olup, Ramazân'da ʿuzamây-ı devletden birinin iftârına varup, sâhib-i hâne yakısını değiştirmek şuglünde iken odaya girüp: "Beyefendi senin dahi yakın var mıdır?" dedikde: "Bendenizde pehlevân yakısı vardır"; "Yakın nerededir?" dedikde: "Arkamda" dediği beyne'z-zurafâ telmîh-i melîh kabîlinden ʿadd olunmuşidi. Eyyâm-ı ʿömr vâsıl olup hadd-i gāyete Hayfâ heves kesilmedi mahbûb u bâdeden mefhûmunu bazʻan yâd ve hevây-ı cân-fersây-ı mey ü mahbûbdan âh u feryâd eyler idi; tecâvezallâhu ʿan seyyiʾâtihî.