Arnabud tâyifesi bi-hükm-i “el-Hâyinü hâyifün” müşârun ileyhin başından munsarıf olmayup, infikâklarında üft ü irtikâb etdikleri habâsetin verâsında envâʿ-ı mazarrat mülâhaza eylediklerinden gayri, ʿOsman Paşa dahi tebâʿat-ı sâbıkasına nazar ve ʿafva müstehakk olmadığı kantara-i hâtırından güzer edüp, ikdâm ü ihcâm miyânında mütereddid ve belki başında olan evbâşın tekessürünü kāsıd vü râyid olup, bu hâl ile İslimye ve civâr kazâlarında geşt ü güzâr ve reʿâyâ vü berâyâyı pâzede-i hasâr eylediği, maʿlûm-i Sadr-ı ʿâlî-mikdâr olmağla, birkaç defʿa halecân-ı derûnunu izâle eder tahrîrât ile gûş-ı gafletini taʿrîk ve silsile-i bağy ü tecâvüzünü menhec-i tavʿ [V 16b] u inkiyâda [Ü4 145b] tahrîk buyurduğundan gayri, o hılâlde Arnabud tâyifesiyle vifâkları şikāka mübeddel olduğu güyâ istihbâr olunup: “O makūle küştenîler yedinden me-bâdâ bir hatâ zuhûruyla şân-ı Vezâret'e nakīsa tetarruk eder" deyü Vezîr Bilâslı Mehmed Paşa tarafından üç bin kadar asker, cemʿiyyet-gâhına sevk u tesyîr ve iktizâ eylediği hâlde bu asker ile istizhâr edüp, tâyife-i mezkûreyi istîsâl ü tedmîr eylemesi tarafına işâret ü tahrîr olunup, bu reftâr-ı hikmet-âmîz, vikāye-i nefsine dâ'ir olduğunu tahkīk u temyîz ve taraf-ı devletden hakkında bir bâdire zuhûr etmeyeceğini cezm ile ʿinân-ı yek-rân-ı kasd-ı fâsidini semt-i salâha tehzîz eylediyse dahi, kemâl-i itmi'nân-ı istihsâli zımnında cûyân-ı hatt-ı emân olup, matlûbu üzere hatt-ı hümâyûn ile müveşşah emr-i celîl-i istimâlet tarafına irsâl ve vahşeti ünsiyyete ibdâl olunmuşidi. Müşârun ileyhe oldukça itmi'nân-ı kalb hâsıl olup, mu'ahedi olan Arnabudlar'ı ilzâm ve fevc fevc vilâyetlerine ʿazîmet şartıyla hılâl-i râhda yem ve yiyecekleri verilmek bâbında bi'l-istidʿâ taraf-ı devletden tahsîl-i menâşîr ü ahkâm eyleyüp, kendüsi dahi hafif dâyire ile Silistre'ye ʿazîmet ve bu gāyile-i hâyile meded-kârî-yi erbâb-ı ʿakl ü dürbet ile bi'l-külliyye mündefiʿ olup, reʿâyâ vü berâyâ âsûde-nişîn-i mazalle-i râhat oldular.