Ordu-yi hümâyûn Yafa Sahrası'nı madrab-ı hıyâm eyledikde, Kudüs Muhafızı Vezîr Mehmed Paşa, Yafa'ya vârid olup, Îrâd-ı Cedîd tarafından zabt olunan bazı mukātaʿât ʿuhdesine tefvîz u tahvîl ve Yafa Kalʿası, istîlâ sebebi ile harâba müşrif olduğundan, taʿmîr ü termîmi müşârun ileyhe sipariş ile taltîf ü tebcîl olunduğu Cezzâr Paşa'nın mesmûʿu olmağla, Emâret-i [V 15b] Hâcc ile nâyil-i ibtihâc olacağını karâyin-i hâliyye ile istihrâc eyleyüp, kazıyye-i mezkûrenin umûr-ı hâriciyye vü dâhiliyyesine ʿadem-i [Ü4 144b] tevâfuku müşârun ileyhi zirve-i bagy u tuğyâna ez-ser-i nev müstaʿlî vü mürtakī edüp, evvelen Kuds-i şerîf ehâlîsini müşârun ileyhin neşr-i mesâvî-yi mecʿûlesiyle tenfîr ve sâniyen o tarafda bulunan âdemlerini tard u tekdîr etdirdiğinden başka, müşârun ileyhimânın mübâgaza vü muhâsedeleri kâmin iken bâriz ü mütebeyyin olup, muhâbereleri müşâcere ihdâs ve mükâtebeleri muhârebe îrâs eyleyüp, encâm-ı kâr Cezzâr Paşa tarafından Firârî İsmâʿîl Paşa ve berkeşîdelerinden Süleymân Paşa, cemm-i gafîr ve asker-i kesîr ile Yafa Sahrâsı'na gelüp, telâkī-yi ferîkayn ve münâzara-i hasmeyn vukūʿunda, Mehmed Paşa'nın kuvvetü'z-zahr-ı celâdeti olan tâ'ife-i Arnabud bâdî-yi nazarda cümleden evvel rekz-ı hayl ve o tarafa zehâb u meyl etdiğini berü taraf askeri müşâhede ve mukāvemete kudretleri olmadığından, nâ-çâr Yafa Kalʿası'na tehassun ile defʿ-ı sâyil kaydına âmâde oldukları hâlde, Emâret-i Hâcc dahi müşârun ileyhe tevcîh olunmuş olmağla, sebeb-i mezkûr ile umûr-ı hâcc, ʿukde-i teʾhîre dûçâr ve fevt-i vakt emâreleri bedîdâr olduğuna binâʾen, kemâ-kân Eyâlet-i Şâm, ʿAzm-zâde Vezîr ʿAbdullah Paşa'ya ve üzerinde olan Karaman Eyâleti, mutasarrıf-ı sabıkı Vezîr ʿAlâʾeddîn Paşa'ya ibkā ve berîd-i istiʿcâl ile keyfiyyet her birine ʿalâ-hidetin inhâ olundu. Mehmed Paşa bahran ve berren Yafa Kalʿası'nda mahsûr u mahbûs ve imdâd u iʿâneden nevmîd ü meʾyûs iken, o taraflarda geşt ü güzâr üzere olan Donanma-yi hümâyûn Başbûğu top âvâzesin istimâ ve fi'l-hâl tahrîk-i şirâ ile Yafa'ya gelüp, [V 16a] kazıyyeye kesb-i ıttılâʿ eyledikde, merâkib-i Cezzâriyye'yi [Ü4 145a] tard u ibʿâd ve deryâ tarafını küşâd eylediğinden gayri, bu tarafdan dahi maʿiyyet-i Âsafî ile vürûd eden altı yüz kadar Arnabud askeri imdâd ve sefîneye irkâb ve mukābeleye istiʿdâd verilmişidi. Arnabudlar Yafa'ya vâsıl ve Vezîr-i müşârun ileyhe kuvvet-i kalb hâsıl olup, el-yevm muhârebe üzere iseler dahi Mîr-i Hâcclık refʿiyle nüfûzuna halel ve himmetine kesel ʿârız olacağı muhtemel olmağla, bir mâh mukaddem Vezîr Köse Mustafa Paşa'nın fevti haberi vürûduyla üzerinde olan Diyârbekir Eyâleti mahlûl ve mansıb-ı mezkûr ile kayırılması müstasveb-i erbâb-ı ʿukūl olduğuna binâ'en, şehr-i Recebü'l-ferdin altıncı Salı günü eyâlet-i mezkûre, müşârun ileyhe ve üzerinde olan Kudüs Sancağı, Dimyât Muhâfızı ve İç-il Sancağı Mutasarrıfı Mîr-i mîrân Ahmed Paşa'ya ber-vech-i ilhâk tevcîh olundu.