İşbu Cumâdelûlâ'nın on altıncı Salı günü ʿumûmen kapu-kullarının bir kıst mevâcibleri Kubbe-altı'nda taʿdâd u ihsâ ve kabzına meʾmûrlara teslîm ü edâ olunup, on sekizinci yevm-i Hamîs Bâb-ı ʿâlî'de devr vâkiʿ olup, Hazînedâr Ağa vesâtatıyla baʿzı tenbîhâtı şâmil hatt-ı hümâyûn [V 15a] ve teşrîfât-ı mülâtafet-makrûn şeref-resân-ı vürûd ve Sadr-ı vâlâ-kadr hazretlerine bu iltifât-ı Şâhâne bâʿis-i inbisât-ı nâ-mahdûd oldu. İki günden sonra Rikâb olup, ʿavdetde Sadr-ı müşârun ileyh [Ü4 144a] hazretleri taraf-ı hümâyûndan keşîde kılınan esb-i müzeyyene râkib ve birkaç hatve zâhib oldukları hâlde izdihâm-ı tâlibân, inʿâm ile esb-i mezkûr pâ-ber-hevâ ve kāmet-i serv-âsâları meyl-i hazîz-i fütâdegî etmiş iken, yâverî-yi ʿavn-i Mevlâ ile vücûd-ı hayriyyet-nümûdları vâreste-i şiken-i ezâ olup, bu niʿmet-i celîlenin teşekkürü zımnında taraf-ı Âsafâne'lerinden zebh-ı kurbân ve fukarâya vâfir ihsân olundu.