Geçen sene Vehhâbîler'den ticâret kasdıyla İmâm ʿAli radıyallâhu ʿanh hazretlerinin kasabasına vürûd [Ü4 143a] edenlerden biri Âsitâne-i murtazâ'ya pâpûş ile duhûl kasdıyla terk-i edeb ve ehâlîden baʿzıları bu vazʿı istihfâf maʿnâsına haml ile izhâr-ı gayz u gazab eyleyüp, şahs-ı mezkûr kelâm-ı maʿkūl ile menʿ ü tahzîr ve ol dahi şetm ü taʿzîr ve giderek miyânelerinde âteş-i fitne ʿalev-gîr olup, Vehhâbîler'in ekserîsi istîsâl ü ifnâ ve emvâl ü eşyaları nehb ü yağmâ kılındığını, Vehhâbîler Dirʿiyye'ye gelüp, sergerdeleri olan İbn-i Suʿûd'a inhâ ve istigāse ve ahz-ı sâra iğrâ etmişler idi. Merkūm vukūʿ bulan ahvâli Bağdâd Vâlîsi Vezîr Süleymân Paşa'ya ifâde ve maktûllerin kısâs ve yâhûd diyetleriyle vârisleri ırzâ olunup, nehb olunan mâlları dahi istirdâd olunduğu takdîrde, Lahsâ Sahrâsı'nda vâkiʿ olan musâlahaya kemâ-kân riʿâyet eyleyeceğini ve ihmâl ü iğmâz ve ihkāk-ı hakdan iʿrâz olunmak lâzım gelürse, kendü dahi kutr-ı ʿIrâk'a îrâs-ı hasâret edeceğini mübeyyin mektûb ile bir âdemini Bağdâd'a firistâde etmişidi. Zikr olunan fesâd u şûr, Aʿcâm tarafından zuhûr edüp, taleb-i kısâs ve diyet ve istirdâd-ı emvâle mübâderet, İran halkını tekdîr ve bir gāyile-i hâyile ihdâs eyleceğini Vezîr-i müşârun ileyh semîr-i zamîr edüp, leʿalle ve ʿasâ ile imrâr-ı subh u mesâ eylediğini Ser-vehhâbiyân tefattun ve ʿÂne ve Hadîse taraflarını gāret ve Şâm tüccârına hayli hasâret ile izhâr-ı muʿâdât u tezâgun eylediğinden başka, ʿAcemler'in mâtem gicesine [V 14b] müterassıd olup, İmâm ʿAli Kasabası müsevver ve ehâlîsine îrâs-ı zarar gayr-i mütesavver olduğunu bilerek, İmâm Hüseyin hazretlerinin kasabasına dâhil ve leyle-i mezkûrede ehâlî-yi kasaba me'lûf [Ü4 143b] oldukları meşgale-i mâtem ile bî-tâb ve cümlesi der-hâb olup, Vehhâbîler istedikleri gibi katl ü fetke ikdâm ve katʿî çok kimseleri iʿdâm ve zuʿm-ı fâsidleri üzere emvâl ü eşyaların tenfîl ve Meşhed-i İmâm Hüseyin'de muʿallak olan sîm ü zer kanâdîli ve sâyir tuhaf ve yâdigâr-ı kavm-i Aʿcâm'ı ahz u teşyîl ve kubbe-i muʿattaranın bir tarafını hedm ü tenzîl ile âyîn-i Karâmita'yı tekmîl eylediler. Üç sâʿat kadar bu hâl müstemirr olup, izrâr u ifnâ ve ahz u yağmâya yer kalmadığı tehakkuk etdikden sonra, Dirʿiyye'ye ʿavdet eylediklerini birkaç sâʿat mesâfede vâkiʿ Bağdâd askeri ve şiddet-i hubb-i Âl-i ʿAbâ ile şöhret-nümâ olan Benî Şemmer ve Hazâʿil'den baʿzı fityân istimâʿ ile girîbân-ı çâk-ı dâd u figān ve verâlarına düşüp, bir fırkasını pâ-mâl-i senâbikü'l-hayl-i mazarrat u ziyân eyledikleri, baʿzı mevsûku'l-kelim kimselerden istihbâr olunduğundan başka, Bağdâd Vâlîsi dahi bu tafsîle karîb ifâde-i hâl ve İrâniyân lâ-mahâle ahz u intikām dâʿiyesine düşeceklerini mübeyyin tahrîrât irsâl eyledi.