Şehr-i mezkûrun üçüncü Çehârşenbih gicesi sâʿat üç buçukda iken Esîr-bâzârı kurbünde vâkiʿ Hüseyin Ağa Câmiʿi ittisâlinde olan hânelerin birinden âteş zuhûr edüp, tarafeyninde olan dekâkîn ve büyûtu ve câmiʿ-i mezkûru ve Esîr-bâzâr'ını ve Irgâd-bâzârı'nın berükiçesini yakup, yedi sâʿat murûrunda fazl-ı Bârî ve iʿânet ü ikdâm-ı hazret-i Tâc-dâri'yle karşu tarafa sârî olmadan humûd u intıfâya âgāz ve âteş, restegân-ı nâsı secde-ber-endâz-ı şükr-i Îzed-i bî-enbâz eyledi. itfây-ı nâr-ı şuʿle-bârda zâbitânın kemâl-i ihtimâmı hasebiyle baʿzı neferâta elem-i nâr te'sîr ve bâ-husûs Cebeci-başı [V 14a] bir mahall-i mürtefiʿden yere sâkıt olup, şiddet-i tehâfüt baʿzı aʿzâsını rahne-gîr eyledi.