Âmedî-yi Re'îsülküttâb olan Gālib Efendi Paris'e varup, yedinde olan ruhsat-nâme-i hümâyûn ve taʿlîm-nâme mûceblerince Françelü ile ʿakd-i şurût-ı mühâdene ve defʿ-i esbâb-ı mübâgaza vü müşâhane eylediği haberi, [Ü4 141a] tahrîrâtını hâmil olan Tatar vesâtatıyla Südde-i saʿâdet'e vâsıl ve cümleye inbisât-ı derûn hâsıl olduğundan gayri, Fransız Tercemânı -ki îcâd-ı fesâd her bâr muʿtâdı idi- Rikâb Kethudâsı İbrahîm Besîm Efendi'ye gelüp, mâbeyne'd-devleteyn vâkiʿ olan musâlahayı tebrîk zımnında lisânını tahrîk eyledikde: “Cumhûrun musâlahası, maslahat-ı Devlet-i ʿaliyye'ye tevâfuk etdi ise dahi, işbu musâlaha Françelü hakkında gāyet hayırlu oldu” kelâmıyla Tercemân-ı mesfûru dâğ-dâr eylediği, bu mahalle kayd u sebte sezâvâr görüldü. Saferü'l-hayrın yirmi dördüncü günü tasdîk-nâmeler mübâdele ve külliyyen katʿ-ı münâzaʿa vü mücâdele kılındığı haberi dahi vârid olmağla, şurût-ı mezkûre bilâ-tağyîr ʿaynı ile cerîde-i vekāyiʿa zabt u tahrîr olundu.