Bozkır Maʿdeni Emîni Mîr-i mîrân'dan ʿAbdurrahmân Paşa ile Bozkır ehâlîsi beyninde tekevvün eden şikāk, o tarafda kābil-i vifâk olmadığından, takrîr-i mâ-cerâ ve fasl-ı daʿvâ zımnında [V 11b] tarafeyn Âsitâne-i saʿâdet'e gelmişler idi. Paşa-yı mûmâ ileyhin ʿuhdesine Emânet-i Maʿden ve sâyir umûr-ı mühimme muhavvel olup, Bozkır eşirrâsının isnâdâtıyla tekdîr ü tahkīr ve nüfûz u iʿtibârı halel-pezîr olmamak mekāsıdıyla ehâlînin defʿini Darb-hâne Emîni Ahmed Efendi iltizâm ve bu vechile Bâb-ı ʿâlî'ye iʿlâm etmişidi. İhkāk-ı hakk daʿvâsıyla tahrîk-i silsile-i ʿadl ü dâd edenleri hasm-ı garîmleriyle kable'l-mürâfaʿa izʿâc, [Ü4 140b] mugāyir-i mizâc-ı Sadr-ı maʿdelet-intihâc olmağla, şehr-i mezkûrun on yedinci İsneyn günü Efendi-yi mûmâ ileyh ʿazl olunup, ʿillet-i gāʾiyye-i Dâru'd-darb olan Sâhib-i ʿayâr Bekir Efendi, Darb-hâne Emîni nasb olundu.