Anadolu ve Karaman eyâletlerinde vâkiʿ erbâb-ı tîmâr ve zeʿâmet gayr ez-mensûhât Levend Çiftliği ve Üsküdâr ocağlarına rabt olunduğuna binâʾen, fîmâ-baʿd âhar mahalle meʾmûr kılınmayup, bilâ-veled mahlûlleri vukūʿ buldukça âhara tevcîh u ilhâk ve yâhûd kasr-ı yed murâd olundukda, Îrâd-ı Cedîd Defterdârı ve Muʿallem Asker Nâzırı olan İbrâhîm Reşîd Efendi'den baʿde'l-istiʿlâm muktezâsı icrâ olunmak ve mütekāʿidlerin mahlûlü kemâ-fi'l-evvel Îrâd-ı Cedîd Hazînesi'nden zabt olunup, Eşkinci zümresi fîmâ-baʿd Müteferrika ve Çavuş ve eyâlât gediklerine rağbet ve yâhûd Humbaracı ve Lağımcı ocağlarına duhûl ü mütâbeʿat ve yâhûd zeʿâmet ve tîmârlarını Havâss-ı hümâyûn'a tashîh irâdesiyle 'arz u istidʿâya mübâşeret ederler ise, mekāsıd-ı mezkûre merbûtıyyetlerine münâfî bir hâlet olduğundan, vechen mine'l-vücûh müsâʿade olunmamak ve mukaddemâ dâhil-i silk-i nizâm olan Müteferrika ve Çavuş ve Dîvân ve Defter-hâne kâtib ve şâgird gediklüleri ve müretteb şerhlüleri ve sabî kaydıyla mukayyed kâtib-zâdeler ve Enderûn-ı hümâyûn gediklüleri ve mahmî cerîdesinde mesbûtü'l-ism olanlar ve Humbaracı ve Lağımcı ocağlarından olanların haklarında cârî olan şurût-ı kadîme [V 3b] kemâ-kân merî vü muʿteber [Ü4 132b] olup, fekat eyâlet gedikleri refʿ ve nizâmdan evvel ne mikdâr Çavuş ve Kâtib ve Çeri Sürücüsü olarak eyâlet gediklüleri var ise, cümlesi sancaklarının bayrağı altında mevcûd bulunmak üzere Eşkinci kayd ve merbûtıyyet-i mezkûreye idhâl olunmak ve be-nevbet kaydıyla tîmâra mutasarrıf olanların hîn-i me'mûriyyetlerinde be-nevbet sûretiyle seferber olmaları berâtları şurûtundan ise dahi, kayd-ı mezkûr ilgā ve baʿde-ezîn sâyir eşkinciler gibi ocağlar askeriyle me'mûr oldukları mahalde isbât-ı vücûd ve hidmetlerini îfâ etmek ve'l-hâsıl bi'l-cümle mahlûlât ve tevcîhâtlarına dâir olan ahvâl der-kenâr ve Muʿallem Askerî Nâzırı Efendi'ye havâle ile istikrâr-ı nizâmlarına sarf-ı iktidâr olunmak üzere iktizâ eden aklâma ve Eyâlet Nâzırı Efendi tarafına başka başka 'ilm ü haber kāyimeleri verildi.