Eczây-ı vekāyiʿin birkaç mahallinde icmâl ü tafsîl ve ilhâk u tezyîl olunduğu vech üzere fünûn-ı riyâziyyeden olan fenn-i harbin taʿlîm ü teʿallümü fî-zemânınâ hâzâ vücûb derecesine resîde olup, şöyle ki, dâhil-i dâyire-i taʿlîm ü âzmûdegî olan askerin on bini, bî-nizâm askerin yüz binine vakt-i mesâffda gālib olacağları, bürhân-ı ʿaklî ve rüsûh-ı tecribe ile tahkīk olunduğundan fazla ve “Ve eʿiddû me'steta'tüm" nass-ı kātıʿı üzere düşmen-i dîne medâr-ı galebe vü istiʿlâ olacak etvâr u evzâʿ-1 harbiyyenin icrâsına ifrâğ-ı vüsʿ ü kudret, emr-i Bârî ve hükm-i Kird-gârî olduğuna binâʾen, birkaç seneden berü beyne'd-düvel şâyiʿ u müstefîz olan emsile-i muhârebe vü musâdeme ve eşkâl-i mudârabe vü muhâceme bi-cüz'iyyâtihâ vü külliyyâtihâ kuvvetden fiʿle îsâl ve mukābele-i bi'l-misle istiʿdâd ve kudret-i istihsâl olunmak fikri, mir’ât-ı temâsîl-i hakāyık-ı eşyâ olan tabʿ-ı Cihân-bânî'de mürtesem olup, husûs-ı mezkûr usûl-i mecâmiʿ-i umûr olan zevât-ı müteşahhısa ile müzâkere ve kirâren ve mirâren mutâlaʿa vü müşâvere olunup, fi'l-hakīka tavr-ı cedîd-i muhârebenin nefʿ-i küllîsi cümle ʿindinde müsellem olup, şurût-ı nizâmları kānûn-nâme-i hümâyûnda tasrîh olunduğu minvâl üzere tesviye ve bir fırkası Levend Çiftliği'nde ve fırka-i uhrâsı Üsküdâr'da terbiye olunup, teʿalluk-ı nazar-ı kîmyâ-eser-i Şâhâne ile yevmen-fe-yevmen ʿadedleri kesret ve sanʿatları metânet ü kuvvet bulmakda ise dahi, cümûʿ-ı piyâdegân süvârîsiz, hâne-i bî-der ve ʿukāb-ı bî-pere teşbîh olunup, ikdâm u ihcâm ve nakz u ibrâm süvârî gürûhuna mahsûr ve bâ-husūs karağola çıkmak ve askere [V 1b] talîʿa vü dümdar [Ü4 131b] olmak ve mağlûbiyyet-i aʿdâda girü kalanları devşürmek vücûd-ı süvârîye maksûr ve bu esbâb ile süvârî, piyâdeye ve piyâde, süvârîye lâzım u melzûm kabîlinden olduğu tecribet-güzârân-ı ahvâl-ı enâma maʿlûm olup, ancak müceddeden süvârî tertîbi mesârıfât-ı külliyyeye bâdî olmağla, hayr-hâhân-ı Saltanat bu bâbda iʿmâl-i fikr-i dakīk ve mukaddemâ taht-ı râbıtaya idhâl olununan erbâb-ı tîmâr ve zeʿâmetin eşkincileri Levend Çiftliği'nde ve Üsküdâr'da perverde olan piyâdegâna rabt u izâfe ile süvârîye lâzım olan tavr-ı cedîd-i muhârebeyi teʿallüm ü iktisâbda cemʿ-i fâyideteyn husûlünü nakş-ı cerîde-i tahkīk eylediler. Şöyle ki, Memâlik-i mahrûse'de olan erâzînin ekserine tasarruf ile kesb-i refâh u gınā ve imtiyâzât-ı sâʾire ile efrâd-ı nâsa tefevvuk u iʿtilâ edenler, vazʿ-ı kadîmleri üzere hidmetden metrûk olmayup, lede'l-hâce âzmâyiş-i ceng ü mücâdele sebebi ile düşmene ʿan-fehmin mukābele eylemek ve mîrîye min-ciheti'l-mesârıf bâr u sıklet olmayarak ve mesârıfât-ı seferiyyelerini hod-be-hod rûʾyet etmek suver-i maʿkūlesi tahsîl ve evvel emirde Bolu Sancağı, Levend Çiftliği'ne ve Hudâvendigâr Sancağı, Üsküdâr Kışlası'na rabt ile bi'l-cümle sancaklu teşvîk olundukdan sonra, Anadolu ve Karaman eyâletlerinde vâkiʿ sâʾir elviye neferâtı dahi ʿumûmen Levend Çiftliği ve Üsküdâr Ocağı'na rabt ve cihet-i nizâmları ahsen vechile tanzîm ve aklâma zabt olunup, vikāye-i nizâmlarına dâʾir hatt-ı katʿiyyü'l-müfâd-ı hazret-i Şehinşâhî dahi şeref-rîz-i sudûr olmağla, zikr olunan erbâb-ı zeʿâmet ve tîmâr bu meʾmûriyyeti sebeb-i iftihâr ʿaddiyle emr-i Pâdişâhî'ye imtisâl ve fevc fevc [V 3a] ocağlara [Ü4 132a] gelüp, ber-muktezây-ı kābiliyyet süvârîye mahsûs fenn-i harbi rûʾyet ile tahsîl-i tavr-ı ceng ü cidâl eyleyüp, lede'l-iktizâ esraʿ zemânda ocağlarda mevcûd ve meʾmûr oldukları hıdemâtda bezl-i mechûd etmeleri şartıyla ferden ferdâ yoklanup, vakt-i hazarda münâvebeye idhâl ile vilâyetlerine ʿazîmete meʾzûn ve bu tedbîr-i dil-pezîr ile Devlet-i ʿaliyye'nin müretteb ü muʿallem askeri efzûn oldu.