Muʿallem asker içün Kavak Serâyı kurbünde binâ olunan kışlaklarda [Ü4 126a] ʿavn-i Hakk ile yevmen-fe-yevmen neferât efzûn olup, levâzım-ı zarûriyyeleri tahsîline medâr olmak zımnında etrâfında vâkiʿ baʿzı mahallerde dükkânlar binâ olunduğıyçün, bahra karîb püşte üzerinde olan mahalde dahi baʿzı hâne ihdâsına nâs rağbet eylediklerinden, bilâ-muʿaccele ve cüz'î icâre ile zikr olunan mahall tâliblerine tefvîz olunup, hâneler binâsına mübâşeret ve berü tarafda dahi vâfir dükkân ve kahve-hâne müceddeden yapılmağla, mahall-i mezkûr bir şehr-i ʿazîme müşâkil olup, Cumʿa ve sâyir ferâyizi cemāʿatle edâ, Üsküdâr'a varmağa münhasır olduğu hüveydâ olduğundan, Evkāf-ı hümâyûn mülhakātından olarak Kavak Serâyı kurbünde "Selîmiyye” ismiyle mersûm bir câmiʿ binâsına irâde-i menâyih-ifâde-i Şâhâne levha-tırâz-ı vukūʿ ve işbu Zilkaʿde'nin on beşinci günü ihtiyâr olan sâʿat-i saʿdda binâ ve ihyâsına me'mûrlar dâmen-çîn-i bed' u şurûʿ oldular.