Belgrad'da kazâ-zede olan Vezîr Mustafa Paşa'nın ʿan-asl Silahdârlığı'ndan neş'et ile Rütbe-i Mîr-i mîrânî'ye [Ü3 205a] nâyil ve giderek derece-i Vezâret'e vâsıl olan Hüseyin Paşa'nın Mısır cenginde pâydârlığı beyne'n-nâs şâyiʿ olduğundan, hem-pâyeleri hakkında zuhûr eden muʾâhazeden sâlim ve orduda bekāsı dahi gayr-ı lâzım olduğu hasebiyle mansıbı tarafına ʿâzim olmuşidi. Vâfir haşerât ile bilâd-ı vâsiʿa-i Pâdişâhî'de geşt ü güzâr ve cerâyim-i sâbıkasını tezekkür ile bir mahalde ʿadem-i istikrârından gayri, tevcîh olunan menâsıbın baʿzısından mütevahhiş ü müteneffir ve baʿzı mahallerin halkı dahi havf-ı savletinden memlekete uğratmayarak mukābeleye âmâde vü hâzır olup, bilâhare Diyârbekir'e duhûl ve sûret-i [Ü4 126b] zâhirde serkeşlikden nükûl etmişidi. Çok geçmeden tabîʿat-ı ʿakrabiyyesi tezebzüb ve mütemevvilân-ı memleket üzerine tevessüb edüp, niçe hâneleri mesken-i bûm u gurâb ve niçe tüvângerleri mübtelây-ı şikençe-i ʿazâb ile muhtâc-ı meʾâkil ü siyâb eylediğinden fazla, mâlına tamaʿan Şâfiʿî Müftîsi'ni iʿdâm ve buna mümâsil katʿî çok ʿulemâ' u meşâyıha sell-i seyf-i hısâm edüp, hâric-i memleketde dahi eli yetişdiği kadar reʿâyâ vü berâyâyı mukayyed-i dü-şâha-i gezend u zarar ve fîmâ-baʿd ahz u fetke mahall kalmadığını tefekkür ile şehirden be-der ve tarafına tevcîh olunan Marʿaş'dan katʿ-ı nazar ile Sivas'a doğru ʿazîmet ve kapusunun kesretinden bahs ile dahi nemâlı bir mansıb talebine cesâret ve başında olan dağlu ve sâyir eşrârı etrâfa teslît ile envâʿ-ı hasârete tesaddî eylediği, maʿlûm-i evliyây-ı devlet oldukda, Mısır gāyilesi ve Rumeli ihtilâli mülâhaza olunarak hakkından gelinmek husûsu [Ü3 205b] te'cîl ve Trabzon Eyâleti, müşârun ileyhe ve Diyârbekir Eyâleti, Vezîr Tayyâr Paşa'ya tahvîl olunmuşidi. Trabzon'a ʿazîmet bir vechile hâline el vermeyüp, Sivas ve yâhûd âhar bir mansıb-ı vesîʿü'l-ercâ tevcîhini sûret-i tehakkümde tahrîr ü işâret etmekle, Sivas tarafına ve Trabzon, Vezîr Köse Mustafa Paşa'ya tevcîh olunup, ehâlî-yi Sivas ʿan-asl teʿaddî vü tecâvüzünden pür-bîm ü hirâs olmuşiken, iʿmâl-i Sivas'dan Kazâʾ-i Erbaʿa mukātaʿasında sâkin Tayyâr Paşa'nın birâderi Hasan Bey'i basup, mâlını gāret ve kırk bin guruş tecrîm ile merkūmu mübtelây-ı hasâret ve Turhal Kasabası'nda envâʿ-ı fezâhate mübâşeret eylediği, Sivas halkının bi'l-külliyye vahşet ü nefretlerine [Ü4 127a] bâʿis-i kuvvet olmağla, vilâyetlerine Vâlî olmasını bir dürlü kabûl etmeyüp, Der-i devlet-medâr'a ilticâ ve defini recâ ve müsāʿade olunmadığı sûretde muhârebeye mübâşeret edeceklerini ʿarz u mahzarlarında îmâ etmişler idi. Fi'l-hakīka hâric-i Sivas'da intizâr-ı haber ile karâr eylediği hengâmda etrâf u eknâfı tâht u târâc ve reʿâyâ vü berâyâyı kemâliyle izʿâc eyleyüp, dest-i eziyyetinden tahlîs-ı nefs edenler kasabât u bilâda tehassun ve yahûd saʿbü's-sülûk cibâl ü şeʿâfda temekkün eyledikleri teʿayyün etmekle, istîsâli husûsunda dâmen-i himmet teşmîr ve müşârun ileyhimâya ve Çapâr-zâde'ye nihânî evâmir tahrîr olunup, her tarafdan muhâsara ve âgāz-ı müşâcere ile cemʿiyyeti tefrîk ve mahsûr olduğu Yenihân'dan bir gice firâr [Ü3 206a] ve birkaç âdem ile Kızılırmağ'ı güzâr edüp, ʿakab-gîrân yetişüp, başını katʿ ve mazarrat-ı ʿammesini defʿ edüp, Bozok Sancağı'nda keyfiyyet vukūʿ bulduğundan, Çapâr-zâde tarafından evâyil-i Muharrem'de ser-i maktûʿu Âsitâne'ye vâsıl ve mevzûʿ-ı ʿibret-gâh-ı gerden-keşân u erâzil oldu. Def-i haşerât ve istîsâl-i bugātda Tayyâr Paşa teferrüd ve Köse Mustafa Paşa izhâr-ı tecellüd edüp, Çapâr-zâde dahi nahçîr-i merâmı sayd u iftirâs ve bilâ-tekellüf bend-i fitrâk-ı ihtilâs etmiş bulunduğundan, birer sevb-i semmûr kürk ile taraf-ı Cihân-bânî'den tefrîh ve hıdmetleri pesendîde olduğu taraflarına hitâben sâdır olan evâmir-i ʿaliyyede tevzîh ve münhall olan Sivas ve Trabzon mansıbları mutasarrıf-ı sâbıkları müşârun ileyhimâya kemâ-kân tevcîh ü ihsân olundu.