Paris'de ikāmet eden ʿAli Efendi, musâlaha esâsı olarak bundan akdem tanzîm ü imzâ etdiği şurût sûretini Âsitâne-i saʿâdet'e irsâl eylediğine müteʿâkıb, İngiltere'den bu tarafda olan [Ü3 203b] elçilerine ʿAli Efendi'nin imzâsı târîhinden sekiz gün mukaddem [Ü4 125a] Londra'da Fransa Murahhası ile ʿakd olunan esâsda Devlet-i ʿaliyye'nin dahi musâlaha esâsı müzâkere olunup, tahliye-i Mısır ve Cezâyir-i Sebʿ[a] nizâmı olarak iki mâdde idhâl ve kabûl etdirilüp, “Amyen” nâm mahalde müttefikler murahhasları ictimâʿıyla musâlahaya karar ve Devlet-i ʿaliyye maslahatı dahi mahall-i mükâlemeye gönderilecek İngiltere Murahhası'na tefvîz olunduğu hâlde, kendi maslahatları gibi nizâmına ihtimâm edeceklerini işʿâr eylediklerini, Âsitâne'de olan İngiliz Elçisi takrîriyle inhâ ve Paris esâsına ʿadem-i iʿtibâr ile Londra esâsı kabûl ve Devlet-i ʿaliyye musâlahası vazʿ etdikleri esâsa binâ olunmak teklîfinde kemâl-i ısrârını îmâ edüp, nâ-çâr Paris esâsından sarf-ı nazar ve Londra esâsı muʿteber kılınup, tasdîk-nâme hükmünde baʿzı tahrîrât Fransa tarafına irsâl ve Devlet-i ʿaliyye maslahatını ecânib ru'yet etmek muhıll-i şân olduğundan, ʿAlî Efendi mükâleme mahalline gidüp, İngiliz Murahhası maʿrifeti ve Rûsiyye Murahhası'nın inzımâm-ı re'yiyle musâlaha-i Devlet-i ʿaliyye'yi müzâkere ve ʿakd etmesi içün tarafına ruhsat-nâme îsâl ve bu mazmûnda zikr olunan elçilere takrîrler ile ifâde-i hâl kılınmışidi. Françe'ye tahrîrât-ı mezkûre vusûl buldukda, Paris esâsının ʿadem-i tasdîkı Bonaparta'ya bâʿis-i renciş olup, Fransa'da umûr-ı ecnebî ru'yetine nâzır olan Taleyran nâm Vekîl'den, Re'îsülküttâb [Ü3 204a] Efendi'ye vürûd eden cevâb-nâmede Fransalu, Devlet-i ʿaliyye ile musâlahaya râgıb ise dahi, âharın taʿarruz u inzımâm maʿrifetini istemeyüp, münferiden musâlahaya hâhiş-ker ve beher hâl Paris esâsı tasdîk olunmak muharrer olmağla, her çend Londra esâsı ilgā [Ü4 125b] ve Paris esâsı ibkā olunmak içün ihtimâm olunduysa dahi, İngiltere Elçisi izhâr-ı sûret-i imtinâʿ vü ibâ ve esâsları kabûl olunmadığı sûretde devletlerine şeyn ü ʿâr lühûkuyla fesh-i râbıta-i ittifâk lâzım geleceğini iddiʿâ etmekle, merbût-ı tarafeyn olan rişte-i maslahatın ahad-ı tarafeyni inkıtâʿ bulmak münâsib görülmeyüp, husûs-ı mezkûr birkaç defʿa erbâb-ı meşveret ile müzâkere ve Paris'e mahsûs bir Murahhas gönderilmek ve o tarafda İngiltere ve Rûsiyye murahhaslarını ırzâ ile şıkkaynın birine zafer bulup, Françelü ile şân-ı Devlet-i ʿaliyye'ye muvâfık musâlahayı ʿakd ü itmâm etmek tedbîri karâr-gîr olduğundan, Re'îsülküttâb Âmedcisi Gālib Efendi mükâlemelerde bulunup, bu makūle mesâlihin cümlesine vukūfu derkâr olduğundan, yedine ruhsat-nâme-i hümâyûn iʿtâ ve huzûr-ı Kāyim-makâmî'de gûş-i liyâkatine Murahhaslık kürkü iksâ ve kâffe-i levâzımâtı mîrî tarafından ru’yet ile işbu Zilkaʿde evâsıtında me'mûr olduğu tarafa isrâ olundu. Efendi-yi mûmâ ileyh Âmedci Vekîli olup, Ordu-yi hümâyûn'un Âsitâne-i saʿâdet'e duhûlünde vekâletden ʿazli ve bu hâl ile nüfûz u iʿtibârının zevâli müteyakkın olduğundan, asâlet, mûmâ ileyhe bâ-irâde-i seniyye [Ü3 204b] tevcîh olunup, orduda asıl olan Mâhir Efendi Âsitâne'ye gelinceye dek vekâlet etmek ve el-hâletü hâzihî bu tarafda Gālib Efendi'nin vekîli olan Ahmed ʿAfîf Efendi kemâ-kân Âsitâne'de vekâletde kalmak üzere nizâm verilüp, sûret-i irâde, Sadrıaʿzam ve Serdâr-ı ekrem hazretlerine ifâde olundu.