Mısır iklîminde ʿavn-i Bârî ve mahzâ [Ü3 202a] himmet-i Tâc-dâri'yle emr-i ʿazîm ve hatb-ı cesîm denilecek bir madde kalmayup, Saʿîd tarafına firâr eden ümerâda dahi zaʿf u tezelzül nümâyân ve refte refte üzerlerine taʿyîn olunan asâkir-i Pâdişâhî'nin sadmesine tehammül edemeyüp, gâh Asvân ve gâh Sudan semtlerine gürîzân oldukları mütehakkak ise dahi, Mısır Vâlîsi Husrev Paşa'nın Kapucular Kethudâsı olup, mukaddemâ Mîr-i mîrânlık ile kadri terfîʿ Cerce Hâkimi nasb olunan Hasan Paşa'nın maʿiyyetine vâfir asker verilüp, Saʿîd tarafına taʿyîn ve ümerânın indifâʿı husûsu tavsiye vü telkīn olunduğundan gayri, Tâhir Paşa ve sâyir mîrîlü asker dahi Mısır Vâlîsi maʿiyyetine meʾmûr ve ümerânın izâle-i vücûdları meşrûʿiyyetini mutazammın mezâhib-i erbaʿa müftîlerinin verdikleri fetvâ mûcebince kabâyil ve ʿUrbân'a ısdâr-ı menşûr kılınup, bu keyfiyyetin râbıtası ve Mısr-ı Kāhire Eyâleti'nden şimdiye dek tahsîl olunan emvâlin mübâşirleriyle rüʾyet-i hisâbı ve sâyir nizâmât-ı Mısrıyye'nin kuvvetden fiʿle îsâli zımnında irâde-i seniyyeye teʿalluk eden Kethudây-ı hazret-i Sadr-ı ʿâlî ʿOsmân Efendi dahi Mısır'da tevkīf ve her mâdde kendüye tavsiye vü taʿrîf olunup, fîmâ-baʿd Mısır'da Ordu-yi hümâyûn'un meksi hasâret-i mîrîyi müstelzim ve fâyide-i zâyideyi mûcib [Ü4 124a] olmadığı zâhir olduğundan, Sadrıaʿzam hazretlerinin hareketi lâzım gelüp, tavâyif-i askerîyi ihâtaya vâfî sefâyinin ʿadem-i vücûdu ve farz-ı muhâl ile sefâyin bulunup, vasat-ı şitâda deryânın şiddet-i telâtum [Ü3 202b] u emvâcı, bahran ʿazîmete mâniʿ olduğundan, merâkib-i mevcûdeye fekat Ocağlu irkâb ve kendüleri sâyir asâkir ile berren ʿazîmeti istısvâb buyurmuşlar idi. Şevvâlü'l-mükerremin beşinci günü Mısır'dan hareket ve baʿzı levâzım ruʿyetinden sonra, mâh-ı mezkûrun onuncu günü Şâm'a doğru zâmile-bend-i ʿazîmet olmuşlar idi. Zilkaʿde gurresinde Gazze'ye ve yirmi birinde Şâm'a vusûl ile berârî-yi Mısrıyye'yi katʿ eden cimâl ve hayvanât-ı sâyireyi irâha ve Mevkib-i hümâyûn'da mevcûd sâyir havâss ve efrâd-ı nâsdan vaʿsâ'u meşekkat-i seferiyyeyi izâha kasdıyla birkaç gün ârâm ve Zilhicce'nin beşinci günü Şâm-ı şerîf'den dahi harekete kıyâm ile on üçüncü günü Hamâ pîşgâhına darb-ı hıyâm buyurup, o havâlîde olan bekāyâ ve emvâl-i mîrîye nizâm ve Antakya ve Bagras semtlerinden murûr, Küçük ʿAli-oğlu'nun beher hâl gāyilesini defʿa zarûret ilcâ eyleyeceği ve şimdilik zemân ü mekân müsâʿid olmadığından, vakt-i âhara taʿlîk ile tarîk-ı mezkûrdan sarf-ı enzâr ve Haleb tarafından ʿazîmet ihtiyâr olunup, katʿ-ı mesâfe ile Sahrây-ı Halebü'ş-şehbâ'ya rekz-i râye buyurmuşlar idi. ʿAyntab Voyvodası Hüseyin'den hıdmet ümmîdiyle Kapucu-başılar zümresine idhâl ve taraf-ı mîrîden nizâm-ı hâli ikmâl olundukdan sonra, Fransız seferine me'mûr olup, Şâm'a vusûl ve ʿAkkâ muhâsarasını istimâʿ ile girüye kufûl ve Ordu-yi hümâyûn ile Sadrıaʿzam ve Serdâr-ı ekrem [Ü4 124b] hazretleri o hılâlde Adana'yı teşrîf [Ü3 203a] buyurmuş olduklarından, sebkat eden cürmünden iğmâz olunup, Kilis ve Aʿzâz hâslarıyla iʿzâz ve iki bin biyâde ile tekrâr sefere me'mûriyyeti irâde olunup, kavl-i leyyin ve mu'âmele-i heyyin ile merkūmdan defʿ-i havf u ihtirâz olunmuşidi. Emr-i ʿâlîye ʿadem-i itâʿatle lecc ü ʿinâd, girîve-gerd-i vâdî-yi fesâd olduğundan, Haleb Vâlîsi Vezîr İbrâhîm Paşa üzerine top ve mühimmât ve asker ile me'mûr ve tekābül-i ferîkayn vukūʿunda, Vezîr-i müşârun ileyh mağlûben Haleb'e gelüp, şakī-yi merkūm kuvve-i istidrâciyyesine magrûr ve fukarâ vü zuʿafâyı zulm ü cevriyle dil-rîş ü mağdûr edüp, iltizâm-ı muktezayât-ı vakt ü hâl ile bu defʿa dahi te'mîn ve hakkında sâdir olan emr-i ʿâlînin kaydı terkīn olunmuşidi. Serdâr-ı ekrem hazretleri Şâm-ı şerîfe pây-endâz-ı vusûl olduklarında, merkūm Ordu-yi hümâyûn'a gelmek arzûsunda olduğunu beyân ve tâlib-i re’y ü emân olmağla, mü'evvel reʼy iʿtâ ve Mevkib-i hümâyûn Haleb'e geldikde, merkūm dahi gelüp, birkaç gün eşgāl ve iʿdâm u izâlesiyle zîr-i destân u reʿâyâ müreffehü'l-hâl ve mutma'innü'l-bâl kılındı. Maktûlün Deli-başısı şiddet-i şekîme ile meşhûr ve zulm ü iʿtisâfda sânî-yi Tîmûr olup, anın dahi cezâsı tertîb ve sâyir hevâdârları dahi kimi izâle ve kimi terhîb ü te'dîb olundu.