Ebâhûr civârında vâkiʿ sedd murûr-ı zemân ve telâtum-ı bahr-i bî-pâyân ile vîrân olup, Rahmâniyye'den İskenderiyye'ye gelan suyun mecrâsına dek bir göl peydâ ve bu defʿa İngilterelü suyun mecrâsını hafr ile İskenderiyye verâsına varınca bahrı icrâ ve müceddeden bir göl ihdâs eyledikleri ihbâr u inbâ olunup, mecrây-ı âbı imlâ ve Ebâhûr tarafında vâkiʿ olup, mukaddemâ münhedim olan seddi inşâya ricâl-i devletden birinin me'mûriyyeti irâde ve bu maslahat, sâbıkā Hubûbât Nâzırı Mehmed Sâlih Efendi'nin gerden-i sadâkatine kılâde kılındığından gayri, Dimyât ve Reşîd gümrükleri dahi ʿuhdesine tefvîz olunup, müstevfâ meʿâş ve sedd ve imlây-ı gadîr maslahatına iktizâ eden mesârıfât, İskenderiyye ve ʿuhdesinde olan Reşîd ve Dimyât gümrükleri hâsılâtından taʿyîn ve vefâ etmediği hâlde Mısır Hazînesi'nden memhûr temessükü mûcebince ahz u sarf ve îrâd ve mesârıf defterlerini Der-i devlet-medâr'a göndermek üzere evâyil-i Şevvâl'de [Ü4 123b] mûmâ ileyhe iksây-ı hilʿat ve ifâde-i me'mûriyyet kılınup, fenn-i binâda mehâreti mücerreb olan İsveclü mühendis Rode dahi mûmâ ileyhe terfîk ve birkaç gün zarfında mâ-lezimeleri tanzîm ü tensîk olunup, Efendi-yi mûmâ ileyh meded-kârî-yi bâd-ı şimâl ile cânib-i Mısır'a şirâʿ-güşây-ı istiʿcâl oldu.