Bir müddetden berü Ordu-yi hümâyûn'da Defterdâr olan Recâ'î Efendi'nin öteden berü nihâl-i âmâli, gars-ı yemîn-i Sadr-ı Âsaf-temkîn olduğuna binâ'en, devlete âdem yetişdirmek ve mûmâ ileyhin derece-i istiʿdâd u haysiyyetini yoklamak kasdıyla defʿaten Kalyonlar Kâtibi ve Ordu-yi hümâyûn ile Mısır'a hareket ve teveccühlerinde Mektûbî Baş-halîfesi ve Seyyid Sâdık Efendi mahlûlünden Mektûbçu nasb olunduğu mahallerinde zikr olunmuşidi. Defterdâr-ı vakt bulunan Çelebi Reşîd Mustafa Efendi, ordunun keyfiyyetini ifâde ve sene-i âtiye tertîbâtını âmâde etmek sûretinde Âsitâne-i saʿâdet'e pâ-nihâde olup, bu tarafda istihdâmına irâde-i ʿaliyye teʿalluk ve Saʿdullah Efendi, Baş-defterdârlık ile akrânına tefevvuk edüp, bir müddetden sonra mûmâ ileyh Sadr-ı aʿzam Kethudâlığı'yla mübeccel ve Defterdârlık bu cihetle münhall olmuşidi. Efendi-yi mûmâ ileyhden enseb [Ü3 191b] Ordu-yi hümâyûn'da bir şahıs bulunmadığından, bi'l-istîzân Defterdârlık câh-ı refîʿiyle fark-ı iʿtibârı müvâzî-yi evc-i Ferkadân kılınmışidi, Mısır-ı Kāhire'yi aʿdâ henûz ihlâ etmeden mukaddemâ tâ'ife-i mesfûrenin ehâlîye tarh eyledikleri zulmüyle bekāyâsının tahsîlinde ʿacelesi ve erbâb-ı vezâyifin müstehakk oldukları revâtibin iʿtâsında mümâtale ve ʿunf ile muʿâmelesi ve istîlâdan henûz reh-yâb-ı selâmet olmuş ehâlîye rıfk u hilm iktizâ eder iken, mutâlebe-i rüsûm-ı Dîvâniyye ile izhâr-ı şiddet eylemesi, mizâc-ı hazret-i Sadâret-penâhî'ye [Ü4 128a] muhâlif görülüp, ʿazlini ızmâr ve işbu Ramazân-ı şerîf evâsıtında mûmâ ileyhi ʿazl edüp, Âsitâne-i saʿâdet'e tesyâr buyurmuşidi. Baş-muhâsebe Kalemi küttâbından olup, Ordu-yi hümâyûn'da Kîsedâr ve bir aralık da Vekîl-i Defterdâr olan Hasan Efendi, ilcây-ı zarûret ile bi'l-fi'l Defterdâr nasb ü taʿyîn ve ehâlî-yi Mısır şiddet-i mutâlebât ve mu'âhazeden tahlîs u te'mîn olunup, maʿzûl-i mûmâ ileyh dahi o tarafdan fekk-i tınâb-ı ikāmet ve bahran Âsitâne'ye gelüp, tanzîm-i esbâb-ı istirâhat eyledi.