Serhadd-ı mezkûrun ihtilâli ve Muhâfızı olan Vezîr Mustafa Paşa'nın askeri, Fethülislâm tarafında bulunmak hasebiyle müdâfaʿa-i eşkıyâda zaʿf-ı hâli bâlâda zikr olunan kazıyyeyi îrâs eylediğinden, [Ü4 113a] nizâm-ı belde ve tasfiye-i tarafeyn irâdelerinde mukaddemâ Devlet-i ʿaliyye tarafından me'mûr Râgıb Efendi ve Ocak-ı ʿâmire Mübâşiri Belgrad'a varup, kavl-i leyyin ile yamakları ilzâm ve zabt eyledikleri çiftliklerden ferâgatla fîmâ-baʿd rızây-ı devleti iltizâm eylediklerinden, emîn olamadıkları Muhâfız-ı müşârun ileyhe İsmâʿîl muhâfazası ve İsmâʿîl'de olan Mehmed Paşa'ya Silistre Eyâleti'yle Vidin ve Niğbolu sancağları ve Niğbolu'da olan Vezîr Hasan Paşa'ya Belgrad Muhâfızlığı tevcîh olunduğundan gayri, ıslâh-ı zâtü'l-beyn husûsunda gûyâ izhâr-ı sadâkat eden Belgrad Kadısı -ki [Ü3 190b] fettân-ı bî-ʿakl olduğu maʿlûm ve vardığı mahallerde şöhreti “Ecverü min Kādî-yi Sedûm” idi- fitne-perdâzân-ı memleket iltimâsıyla bi'l-fiʿl Üsküdâr Kadısı nasb olunmuşidi. Me'mûrlar Âsitâne-i saʿâdet'e ʿavdetlerinde, eşkıyâ baʿzı esbâb-ı vâhiyeye temessük ve ʿala-rivâyetin Kādî-yi mezbûrdan iʿlâm ahzıyla müşârun ileyhi iʿdâm eyledikleri haberi tevârüd edüp, Vidin ve Belgrad şekā-pîşeleri birleşmek ve zahîre ve muhâbereleri inkıtāʿ bulmak mekāsıdıyla Bosna Vâlîsi Bekîr Paşa, Niş câniblerine taʿyîn ve sâyir turuk u meʿâbir âhar me'mûrlar ile tahsîn olunmuşidi. İnsidâd-ı etrâf ile zahîreden kemâl-i zarûretleri, Nemçelü tarafından celb-i zehâyire kendülerini mecbûr edüp, Nemçelü dahi Devlet-i ʿaliyye'ye tebaʿiyyet ve rızâya makrûn keyfiyyete mebnî, mukaddemâ zahîre verdiklerini beyân ve sûret-i şekāvetde olanlara kâyinen mâ-kân zahîre vermeyeceklerini âverde-i zebân eylediklerinden, nâ-çâr Devlet-i ʿaliyye'ye ilticâ ve Mustafa Paşa kazıyyesi kendüyi bilmez ve maʿkūlu dinlemez şübbân-ı memleketden zuhûr edüp, fi'l-hâl ahz [Ü4 113b] u cezâları tertîb olunduğu ve kazıyyede medhali olanlardan fekat bir-iki şahs-ı tebeh-kâr, Arnabudluğ'a firâr ve her ne vakit Belgrad'a gelürler ise ahz ü istîsâl olunmak ʿahdi, miyânelerinde sübût-yâfte-i istikrâr olarak, serhadd-i Pâdişâhî'yi istısfâ olunduğu ve Devlet-i ʿaliyye keyfe-mâ-yeşâʿ memlekete mutasarrıf olup, muʿtedil bir Vezîr Muhâfız [Ü3 191a] nasb etmek maʿnâlarını şâmil Kapudan Paşa hazretleri tarafına niyâz-nâme irsâl ve dâmen-i ʿafva itâle-i yed-i istizlâl etmeleriyle, muktezayât-ı vakt ü hâl iltizâmı, savâb-dîd-i erbâb-ı re'y ü tedbîr ve ʿafvi mümkin olmayan cerâyim-i güzeşteleri vakt-i vüsʿate bâz-beste-i te'hîr olup, fîmâ-baʿd Îrâd-ı Cedîd Hazînesi vâridâtına ʿadem-i taʿarruz ile Vidin tarafına zahîre ve cihât-ı sâyire ile iʿânet olunmamak ve çiftlikler mâddesinden külliyyen keff-i yed ve puruz tevzîʿinden mübâʿadet ile şimdiye dek terâküm eden emvâl-i mîrîyi irsâle müsâraʿat ve muhâfızları olan Vezîr Hasan Paşa'nın re'yine inkıyâd u itāʿat etmeleri şurûtuyla, ʿafvı mutazammın mü'ekked ü mufassal emr-i ʿâlî ısdâr ve sâbıkā Isparta Mütesellimi Kapucu-başı Hüseyin Ağa, Belgrad Muhassılı taʿyîn ü tesyâr olundu.