Mîr-i müşârun ileyh seferlerde istihdâm olunarak, cevher-i istiʿdâd u mâhiyyeti pesendîde-i hakāyık-şinâsân-ı rûzgâr ve câme-i gülgûn-tırâz-ı haysiyyeti, tamgā-zede-i destgâh-ı ashâb-ı iʿtibâr olup, Âsitâne-i saʿâdet'e vürûdlarında istiʿdâd-ı mâder-zâd ve kābiliyyet-i Hudâ-dâd iktizâsıyla baʿzı menâsıba tevellâ vü tasarruf eyleyerek, Tersâne-i ʿâmire'ye Emîn [Ü4 110a] iki sene mikdârı o hidmet-i cesîmede ser-zede-i zuhûr olan ikdâm u himmeti mûcib-i tahsîn ve bâʿis-i teveccüh-i Şehriyâr-ı İskender-temkîn olup, hüsn-i cezâ vü mükâfât irâdesiyle Bâb-ı ʿâlî'ye takrîb ve bi'l-fiʿl Dîvân-ı hümâyûn Çavuş-başılığı [Ü3 187a] ile tatyîb olunmuşidi. Françelü ile sefer mukarrer olduğuna binâ'en, Devlet-i ʿaliyye ile râbıta-bend-i ittifâk olan İngiltere donanmasına müretteb ecnâs-ı zehâyiri sevâhil-i Bahr-i sefîd'den cemʿ ve defʿ içün mütemeyyizân-ı Devlet-i ʿaliyye'den sâhib-i rütbe ve iʿtibâr bir zât-ı maʿlûmu'l-mişvârın taʿyînini erbâb-ı elbâb istisvâb ve bu keyfiyyet maʿrûz-ı Rikâb-ı kâm-yâb kılınmışidi. Müşârun ileyh hakkında kârger olan vüsûk ve iʿtimâd-ı Şâhâne hasebiyle bilâ-ihtâr u tezkîr karîha-i sabîhadan me'mûriyyetleri hatt-ı şerîfi tahrîr buyurulup, bilâ-menn ü tereddüd tesviye-i lâzime-i tarîka berçîde-dâmen-i tekayyüd olup, mahalline vardıkda, rızây-ı yümn-iktizây-ı Devlet-i ebed-müddet üzere hareket ve tâyife-i mezkûrenin her ne kadar ru'ûnet u huşûnetleri maʿrûf ise dahi, dest-yârî-yi hüsn-i tedbîr ü muʿâşeret ile îfây-ı şart-ı imtizâc u ülfet ve cemʿ u tevzîʿ-i zehâyir husûsunda cümlesini vâreste-i kayd-ı zarûret etmişidi. Bundan sonra Mısr-ı Kāhire'ye me'mûr ve o taraflarda dahi hidmeti meşkûr ve saʿyi mebrûr olarak, Âsitâne-i saʿâdet'e imâle-i veche-i ʿavd ü kufûl ve kemâ-kân umûr-ı Dîvâniyye ve mesâlih-i nâs ile meşgûl olup, sevâbık-ı hıdemâtı bi-tefâsîlihâ maʿlûm-ı hazret-i Tâc-dârî olduğundan, Vezâret'le behre-yâb ve aksây-ı merâtib-i beşeriyye ile vâlâ-cenâb kılınması, bir müddetden berü zamîr-i gîtî-izâ'et-i Cihân-dârî'de muzmerr [Ü4 110b] ve bu idâre-i menâyih-ifâdenin icrâ vü tenfîzini mevkūf-ı vakt-i mukadder buyurmuşlar iken, bâlâda tafsîl olunan keyfiyyet [Ü3 187b] vukūʿundan sonra taraf-ı müstelzimü'ş-şeref-i Mülûkâne'den daʿvet ve dûş-ı istihkākına ilbâs-ı hilʿat-i Vezâret kılınup, Sadr-ı ʿâlî-kadr'a Kāyim-makām ve mâlik-i zimâm-ı kabz u ibrâm-ı Devlet-i ebed-kıyâm oldu. [Mısra]: Mustafa Bey oldu istiʿdâd ile Kāyim-makām mısraʿ-ı bercestesi çekîde-i kalem-i Çâkerî'dir. Dâ'ire-i Âsafî'lerinde mevcûd hademeden Halîl nâmında bir şahıs, naʿt-ı hazret-i Nebevî'de vârid, [mısra]: Mustafa mâ-câ'e illâ rahmeten li'l-ʿâlemîn mısraʿını ʿalâ-tarîkı'l-iktibâs târîh düşürdüğü, garâyib-i ittifâkıyyâtdan ve tefe'ül bi'l-hayr olunacak keyfiyyâtdan olduğu zâhirdir.