Mâh-ı sıyâm, resîde-i gāyet ü encâm olduğuna binâ'en, işbu Pençşenbih gicesi Müfti'l-enâm ve Kāyim-makām-ı benâm hazerâtı ve sudûr-ı kirâm ve sâyir ʿulemây-ı aʿlâm ve ricâl-i Devlet-i ebed-kıyâm ve mülâzım-ı Dergâh-ı ʿâlî olan ru'esây-ı tavâyif-i askerî seherî ʿatebe-i gerdûn-mertebe-i Şâhâne'ye vazʿ-ı cibâh-ı rıkkıyyet ve tebrîk-i ʿîd behânesiyle âfitâb-ı felek-i Saltanat olan dîdâr-ı fâyizü'l-envâr-ı Tâc-dâri'yle takdîr-i bâsıra-i mefharet eyledikleri ʿakībinde, o Şehriyâr-ı bülend-iktidâr, hayra-sâz-ı ebsâr-ı mülûk-i aktâr olan debdebe-i Cihân-dârî'leriyle Sultân Ahmed Câmiʿi'nde salât-ı ʿîdi edâ ve Serây-ı Mülûkâne'lerine ricʿat ile ol cây-ı Ferkad-sây'ı nümûne-nümây-ı cennetü'l-me'vâ buyurdular.