Müşârun ileyh lüzûm-ı ʿâriza-i şeyhûhet u herem ve hücûm-ı nâyibe-i maraz u sekam ile terk-i dağdağa-i ʿâlem ve mütevârî-yi sürâdikāt-ı ketm-i ʿadem oldu. Hasoda-başı Sâlih Efendi -ki mukaddemâ Baş-muhâsebe Kalemi'nden neş'et ve o Kalem'e dâ'ir kesb-i maʿrifet edüp, evâyil-i cülûs-ı hümâyûnda o dâyire-i fâhireye ruhsat-yâb-ı [Ü3 177a] duhûl ve ihrâz-ı merâtib ile Hasoda-başılık Rütbesi'ne pâ-nihâde-i vusûl olmuşidi- o mesned-i bülende her vechile lâyık u çespân olduğundan, işbu Cumâdelâhıre'nin onuncu günü huzûr-ı mevâhib-mahsûr-ı Şâhâne'de iktisây-ı ferve-i semmûr ile nâyil-i etemm-i sürûr oldu. Müteveffây-ı müşârun ileyh bin yüz kırk sekiz senesi Zilkaʿde'sinde Ak Ağalar gürûhuna dâhil ve refte refte katʿ-ı tarîk ile yetmiş bir senesinde Hasoda-başılık mertebesine nâyil olmuşidi. İntılâk-ı lisân sebebi ile dâ'ire-i mezkûreden [Ü4 101a] ihrâc ve seksan sekizde kemâ-kân makām-ı evveline idrâc olunup, doksan dört senesinde yine Dergâh-ı ʿâlî'den matrûd ve sâkıt ʿani'n-nazar olan metrûklardan maʿdûd olmuşiken, hakkında ʿinâyet-i Lem-yezeliyye rû-nümûd olup, iki yüz târîhinde Bâbü's-saʿâde Ağalığı'yla mahsûd olmuşidi. On altı sene mikdârı o câh-ı refîʿde müstekarr ve yevm-i mezkûrda ribât-ı âhırete müsâfir oldu. Müşârun ileyhin ʿömrü mi'e-i kâmileye mütenâhiz ve ʿalâ-rivâyetin o râddeyi dahi mütecâviz idi. Gaflet ü nisyân o makūlelerin lâzım-ı mâhiyyeti iken, müşârun ileyhin kuvve-i hâfıza sebebi ile zemân-ı kadîmden haber vermesi ve bâ-husûs idrâk etdiği vakitlerde vâkiʿ olan ahvâle kemâ-yenbagī muttaliʿ olması, muhayyir-i ʿukūl olacak keyfiyyâtdan idi.