[Ü4 100b] Eyâlet-i mezkûrede Vâlî olan Vezîr Vânî Mehmed Paşa ʿillet-i remede mübtelâ ve idâre-i umûr-ı memleket husûsunda ʿaczi hüveydâ olduğuna binâʿen, işbu Cumâdelûlâ'nın dördüncü günü maʿzûl ve Gelibolu'da ikāmeti emri tarafına mersûl olup, mukaddemâ eyâlet-i mezkûrede Serʿaskerlik ile bir defʿa Vâlî ve tavr u hareketi pesendîde-i ehâlî olan Vezîr Ebûbekir Paşa'ya mansıb-ı mezkûr tevcîh ve bu cihetle münhall olan Eğriboz Sancağı'yla Bender Muhâfızı Vezîr Ahmed Paşa'nın hâli terfîh olunmuşiken, livâ'-i mezbûr Vezîr Hakkı Paşa ʿarzıyla Mîr-i mîrân'dan Pehlevân-zâde Mehmed Paşa ʿuhdesine iki mâhdan sonra tahvîl ve müşârun ileyh vaʿd-i karîbü'l-incâz ile te'mîl olundu.