ʿAvn-i cenâb-ı Sübhânî ve meded-kârî-yi baht-ı hazret-i kişver-sitâniyle iklîm-i Mısır feth olunup, Âsitâne-i sâʿadet'de nesc olunân Kisve-i şerîfe'nin bir-iki seneden berü cârî olduğu gibi târîk-ı Şâm'dan irsâline hâcet mess [Ü3 177b] etmeyüp, Âsitâne'den sefîne ile Mısır'a ve andan Mekke-i mükerreme'ye îsâli istisvâb ve Kisve Nâzırı olup, sâbıkā Dâru's-saʿâde Ağası Yazıcısı ve Haremeyn Muhâsebecisi Mehmed Efendi bu hıdmetin ru'yetine intihâb olunmuşidi. Cumâdelûlâ'nın dördüncü Sebt günü sâl-i güzeştede tertîb olunduğu âlây-ı dilârâ ile Kisve-i şerîfe Sultân Ahmed Câmiʿi revâkından Serây-ı hümâyûn'a nakl olunup, birkaç günden sonra îsâline me'mûr mûmâ ileyhe teslîm ve bahran o bukʿa-i mübârekeye takdîm olundu.