Fazl-ı Rabbü'l-ʿibâd ile İskenderiyye'den ihrâc u ibʿâd olunan kefere-i bakıyyetü's-süyûfun diyâr-ı nekbet-medârlarına nakl olunmalariyçün lâzım gelan sefâyin ü merâkib fî-esra'i'l-eyyâm nizâm bulup, me'kûlât ü meşrûbâtları dahi ber-vech-i evfâ tertîb ve Reşîd medfûʿâtı gibi yanlarına donanmalardan ceng gemileri taʿyîni ile hengâm-ı ʿazîmetleri takrîb olunup, refte refte sevâhil-i Fransa'ya [Ü3 170a] tesrîb olunarak, işbu Cumâdelâhıre'nin yedinci Pençşenbih günü Kapudan Paşa hazretleri Ordu-yi hümâyûn pûyundan ilmâm u nüzûl ve İskenderiyye'ye pâ-nihâde-i duhûl olup, kalʿa muhâfazasasına ve sâyir palanga ve hasânâtın vikāyesine imlây-ı ecnâd ve ihzâr-ı ʿudde vü ʿatâd edüp, kilîd-i kalʿayı Ser-duhânî'leriyle merfûʿ-ı dergâh-ı Pâdişâh-ı vâlâ-nijâd eyledi. İmdâd-ı Mürsilü'r-riyâh ile mâh-ı merkūmun yirmi beşinci günü sâhil-res-i selâmet ve Âsitâne-i saʿâdet'e gulgule-endâz-ı meserret olup, ibtidâ huzûr-ı Kāyim-makāmî'ye mefâtîh-i mezkûreyi ʿarz u takdîm ve bol yenlü bir sevb-i semmûr kürk telebbüsüyle kesb-i fahr-i ʿazîm edüp, Kapu Kethudâsı Selîm Sâbit Efendi'ye dahi bir sevb bol yenlü semmûr kürk ilbâs [Ü4 96a] ve ol dahi hisse-yâb-ı lutf-i bî-kıyâs kılındıkdan sonra, keyfiyyet huzûr-ı mevâhib-mahsûr-ı Şâhâne'ye ʿarz u ifâde ve mûmâ ileyhimâ dahi Enderûn-ı hümâyûn'a firistâde olundu. Zûr-bâzû-yı devlet ve kuvve-i kāhire-i Saltanat ile feth olunan kılâʿ u meʿâkılın mekālîdi alay ile Serây-ı dilârây-ı Mülûkâne'ye tavsîl ve ve bu takrîb dâmen-bûs-i hazret-i Zıllullâhî ile dest-mâye-i şeref-i tahsîl, kānûn-i dîrîn-i Devlet-i ebed-makrûn olduğuna binâ'en, şehr-i mezkûrun yirmi yedinci Pençşenbih günü Şeyhülislâm ve Kāyim-makām Paşa hazerâtı ve kudât-ı asâkir ve Menâsıb-ı sitte ricâli ve ʿumûmen Ocak ağaları tertîb-i ʿacîb ve nizâm-ı dil-firîb ile Serây-ı bî-hemtây-ı Cihân-dârî'ye ruhsây-ı ʿazîmet ve Top-kapu'da vâkiʿ olup, itmâmı târîhi “Bâğ-ı Tarab (باغ طرب)” ve beyne'n-nâs “Bâğ-ı İrem” ʿunvânıyla müteʿârif olan mevkıʿ-i dil-nişînde [Ü3 170b] vakfe-gîr-i istirâhat olmalarıyla, rûh-ı cismân-ı ʿâlem ve bâʿis-i nizâm-ı ümem olan Şehriyâr-ı tayyibü'l-nesem hazretleri Kasr-ı cedîd'e şeref-bahş-ı nüzûl ve ibtidâ Şeyhulislâm ve Kāyim-makām hazerâtı, huzûr-ı mevâhib-mahsûr-ı Tâc-dârî'lerinde ruhsat-yâfte-i kıyâm u müsûl olmalarıyla, Şeyhulislâm Efendi hazretlerine beyâza kablu ve Kāyim-makām Paşa hazretlerine serâsere dûhte ferve-i semmûr iksâ ve Kapu Kethudâsı'yla Ser-duhânî'ye hâricde hilʿatler geydirildikden sonra, erkân-ı Saltanat ʿumûmen Kasr-ı cedîd Sâhası'na cebhe-sây oldular. Kapudan Paşa hazretlerinin ferah-rîz-i vürûd olan kāyimesini Reʾîsülküttâb Efendi savt-ı bülend ile kırâʾat ve mefhûmunu cümleye ifhâm u işâʿat ʿakībinde Ayasofya Şeyhı duʿâya kıyâm ve baʿde'l-hitâm resm-i tehniyyet icrâsına mübâşeret olunup, yâverî-yi baht-ı müsâʿid ile meclis-i [Ü4 96b] akdes-i Mülûkâne'de bulunan ashâb-ı mesânid vâhiden-baʿde-vâhidin takbîl-i dâmen ile ihrâz-ı dest-mâye-i mekāsıd etdikden sonra, mesrûr u şâdân mahallerine râciʿ u ʿâʾid oldular. Berârende-i nüvîd ve kilîd olan Ser-duhânî'ye beş kîse nemâlı bir sehm ile bir mikdâr nakd ihsân ve emsâli gibi bu dahi manzûr-ı nigâh-ı lutf-i firâvân kılındı. [Mısra]: Cenâb-ı Vâhibü'l-âmâle hamd-i bî-şümâr olsun O arz-ı vesîʿü't-tûli ve'l-ʿarz -ki lisân-ı ebnây-ı zemânede “Ümm-i dünyâ” ʿunvânıyla zîb-i meşîme-i şöhretdir- fazl-ı nâ-mütenâhî-yi İlâhî ile zamîme-i mülk-i Pâdişâhî ve Kur'ân-ı ʿazîmü'ş-şân'da sarâhaten ve kinâyeten zikri tekerrür eden memleket-i fesîhatü'l-ercâ kemâ-kân dâhil-i taht-ı tasarruf-ı hazret-i Şehinşâhî oldu. [Ü3 171a]