On iki seneye karîb müddetden berü Hazîne Kethudâsı ve Mâbeynci olan Çerkes Halîl Ağa me'mûr olduğu hıdemât-ı cesîmede delâlet-i 'akl ü rüşd ile izhâr-ı sadâkat ü ihlâs ve bu tarîka-i enîka ile taraf-ı vâzıhu'ş-şeref-i Mülûkâne'ye kesb-i temahhuz u ihtisâs eylediğinden fazla, zâtında vâkıf-ı mezâyây-ı umûr ve mikyâs-ı [Ü3 169b] endîşe-i mû-şikâf ile ziyâ-bahş-ı efkâr-ı cumhûr olup, mâ-lâ-ya'nîden dâmen-keş-i tebâ'üd ve leyl ü nehâr zirve-i iktisâb-ı 'ilm ü edebe tesâ'ud edüp, merâtib-i devlete 'ale'l-ıtlâk tahsîl-i isti'dâd u istihkāk ve semere-i şecere-i hıdemetiyle kâm-rân kılınması merkûz-ı zamîr-i Şehriyâr-ı âfâk olup, hakkında va'd-i bî-metâl dahi te'kîd-i hâl etmişidi. Mısır ve İskenderiyye'nin fethi haberi vürûdunda va'd-i hümâyûn karîn-i incâz ve matlab-ı a'lâsı olan silsile-i 'ulemâya idhâl ile mümtâz kılınıp, işbu Cumâdelûlâ'nın on altıncı Cuma günü ibtidâ Hâmise-i Süleymâniyye [Ü4 95b] ile tarîka dâhil ve bir gün murûrunda iki [on] yüz yedi Muharrem'inden zabt etmek üzere Mekke-i mükerreme Pâyesi'yle bi'l-fi'l Galata Kazâsı'nı zabt şerefine nâyil olup, iltimâsı üzere bu sâl-i meyâmin-iştimâlde iskāt-i ferîza-i hacc eylemesine dahi ruhsat ihsân ve sunûf-ı 'avâtıf-ı Şâhâne ile kâm-rân kılınup, münhall olan Hazîne Kethudâlığı, makām-ı erba'în olan Hasoda'dan Hidâyet Paşa-zâde Sâlih Beyefendi intihâb ve Hazîne Kethudâlığı rütbe-i celîlesiyle mahsûd-ı etrâb kılındı.