Mebde'-i ʿâlemden bu âna gelince ʿâlem-i kevn ü fesâdda ber-muktezây-ı tezâd vâkiʿ olan nizâl ü tırâd ʿakabinde hâsıl olan feth u nusrata sebeb ü ʿillet ve meydân-ı muhârebede izhâr-ı merdânegî vü celâdet edenlere tavr-ı maʿrûfları üzere iltifât u hürmet, de'b-i dîrîn-i Şehriyârân-ı etrâf ve kānûn-i pîşîn-i Tâc-dârân-ı eslâf olduğuna binâ'en, Pâdişâh-ı bâhirü'l-intibâh dâme fî ʿavni'l-İlâh hazretlerinin fütûhât-ı Mısır ve İskenderiyye'de bulunan vüzerây-ı ʿizâm ve Mîr-i mîrân-ı kirâm ve sâyir hademe-i Devlet-i ebed-kıyâm'larına ve ʿale'l-husûs İngilterelü'nün bahr u berr askerleri sergerdelerine ihsân buyurdukları tefârîk-ı eşyâ ve cevâhir-i girân-behâ ve nukūd-i müstevfâ hâric-i râdde-i hisâb ve nâ-güncây-ı havsala-i [Ü3 168b] erkām-ı kitâb olup, mülûk-i mâziyyenin birinden bu mertebe ihsân zuhûr etmediği, mütetebbiʿân-ı havâdisât-ı rûzgâr olan ashâb-ı itkāna nümâyân olduğundan başka, Avrupa devletleri muhârebelerinde ʿarz-ı celâdet ü hüner, yaʿnî bir kalʿa ve yâhûd tabur cenglerinin birinde [Ü4 94b] müteşahhısân devletlerinin biri tahsîl-i zafer eylese, har-mühre nevʿinden bir nişân ile mükerrem olup, şöyle ki, bi'l-iktizâ beyʿa ʿarz olunsa mukābilinde bir dirhem iʿtâsı müteʿazzir görilüp, Şehriyâr-ı İskender-himem bu defʿa İngiltere sergerdelerine bir rütbe ihsân ü kerem eyledi ki, mersûmlar kemâl-i ferah u inbisâtdan ʿillet-i şâd-merge mübtelâ olup, devletleri imtiyâzâtını fîmâ-baʿd istisgār u istihkāra mecbûr olacağları zâhir ü âşikârdır.